Səudiyyə Ərəbistanı futbolu həlledici mərhələyə daxil olur. Dünyaca məşhur futbolçuların müqavilələrinin başa çatması, bir sıra ulduzların Avropaya qayıtmaq istəyi və Kriştianu Ronaldunun boykotu liqanı ciddi risklərlə üz-üzə qoyub.
Gözləntilərə görə, Səudiyyə Pro Liqası futbolun mərkəzlərindən biri olmalı idi, amma ulduzların ayrılması və maliyyə problemləri bu təsəvvürləri əksinə çevirdi. Səudiyyə Pro Liqasının Məkkə kimi nüfuzlu mərkəzə çevriləcəyini gözləsə də, ulduzların kütləvi gedişi bu ümidləri puç etdi.
Son illərdə misilsiz investisiyalarla futbol bazarını silkələyən Səudiyyə Pro Liqası indi möhkəmlənmək üçün ən kritik dövrünü yaşayır.
Sportnet.az-ın "Abola"ya istinadən məlumatına görə, cari mövsümün sonunda təxminən 125 futbolçunun müqaviləsi başa çatır.
Bu da çempionatın dünyanın aparıcı liqalarından birinə çevrilməsi layihəsini təhlükə altına sala bilər.
Gedənlər və getmək istəyənlər
Səudiyyə Pro Liqasının baş icraçı direktoru Omar Muğarbel investisiyaların qorunacağını bildirsə də, vəziyyət stabillikdən uzaq görünür. O, "Marca"ya açıqlamasında layihənin uzunmüddətli olduğunu desə də, qış transfer pəncərəsində baş verənlər narahatlıq doğurub. “Əl-Nəsr”dən Bento, “Əl-Şabab”dan Yannick Karrasko, “Əl-Hilal”dan Markos Leonardo və “Əl-İttihad”dan Mussa Diabinin mümkün gedişləri bunun bariz nümunəsidir.
Ronaldunun boykotu gündəmi dəyişdi
Son günlər Kriştianu Ronaldunun “Əl-Nəsr”in oyunlarını boykot etməsi beynəlxalq mediada geniş rezonans doğurub. Portuqaliyalı ulduz Səudiyyə Dövlət İnvestisiya Fondunun (PIF) transfer siyasətindən narazıdır. Bildirilir ki, rəqib “Əl-Hilal”la müqayisədə investisiyaların azalması fonunda bəzi klublarda maaş gecikmələri də müşahidə olunur.
Ronaldunun 2023-cü ilin yanvarında “Əl-Nəsr”ə keçidi liqa üçün dönüş nöqtəsi olmuşdu. Həmin vaxtdan bəri transferlərə 2,3 milyard avrodan çox vəsait xərclənib, mənfi transfer balansı isə 1,95 milyard avro təşkil edib. Bu göstəricidə yalnız İngiltərə Premyer Liqası öndədir.
Ulduz axını geri döndü
Lakin gediş-gəliş birtərəfli olmayıb. Cordan Hendersonun “Əl-İttifaq”dan cəmi altı ay sonra ayrılması presedent yaradıb. Ardınca Seko Fofana, Neymar, Taliska, Jota, Aleks Telles və İvan Rakitiç də liqanı tərk ediblər.
Xüsusilə “Əl-İttihad” ən çox zərər görən klublardandır. Komanda N’Qolo Kante və səs-küylü transferlə “Əl-Hilal”a keçən Kərim Benzemanı itirib. Fabinyo və Danilo Pereyranın da ayrılma ehtimalı var. Bundan başqa, Predraq Raykoviç, Hüssem Auar, Stiven Berqveyn və Rocer Fernandeş Avropa bazarında maraq doğuran futbolçular sırasındadır.
Digər nəhənglərdə də qeyri-müəyyənlik
“Əl-Hilal”da Kalidu Kulibali, “Əl-Nəsr”də Marselo Brozoviç, Sadio Mane və İniqo Martines, “Əl-Əhli”də isə Frank Kessininin müqavilə durumu sual altındadır. “Əl-Qadisiyyə”dən Naço Fernandes və “Əl-İttifaq”dan Corcinyo Veynaldum da müqaviləsi bitənlər arasındadır. Yeganə istisna Ruben Neveşdir. O, “Əl-Hilal”la müqaviləsini 2029-cu ilə qədər uzadıb.
Layihə təhlükə altındadır
FIFA prezidenti Canni İnfantinonun vaxtilə “dünyanın ən güclü üç liqasından biri olacaq” dediyi Səudiyyə Pro Liqası indi MLS, Türkiyə və Braziliya liqaları ilə ciddi rəqabətə girib. Ulduz futbolçuların ardıcıl gedişi çempionatın uzunmüddətli dayanıqlılığı ilə bağlı suallar doğurur.
Hazırda liqada hələ də kifayət qədər tanınmış futbolçu var və əsas fiqur yenə Kriştianu Ronaldudur. Lakin yeni ayrılıqlar dalğası və Avropaya dönüş istəyi çempionatı yenidən başlanğıc nöqtəsinə qaytara bilər. Xatırladaq ki, Səudiyyə Ərəbistanı 2034-cü il dünya çempionatına ev sahibliyi edəcək.
