"Zirə"nin hücumçusu Nelson Bonilya "Rəvan"la Azərbaycan Premyer Liqasının XXIX tur matçında 3 qol vurduğu topu özü ilə götürüb. Sportnet.az-ın məlumatına görə, salvadorlu hücumçu topu komandasının paltardəyişmə otağına aparıb.
Orada topun üzərində komanda yoldaşları imza atıblar. Bonilya jurnalistlərə açıqlamasında topu vətəni Salvadora aparacağını bildirib: "Dünyada qəbul olunmuş qayda var ki, het-trik edən futbolçular topu özü ilə götürürlər. Bu, Salvadordan kənarda ilk "het-trik"imdir və Salvadorda mənə Azərbaycanı xatırladan bir hədiyyə olacaq".
Qeyd edək ki, 2015-ci il oktyabrın 22-də Almaniyanın "Borussiya" komandasının hücumçusu Pyer-Emerik Obameyanq Bakıda "Qəbələ"yə 3 qol vurduğu topu özü ilə Dortmunda aparmışdı.
