"Qəbələ"nin əvəzedici komandası tarixində 5-ci mükafatını qazanıb. Sportnet.az-ın məlumatına görə, ilk dəfə Azərbaycan çempionu olan 2011/2012, 2013/2014 mövsümlərində gümüş, 2009/2010, 2010/2011 mövsümlərində bürünc medal qazanan "qırmızı-qaralar” yalnız 3 dəfə mövsümü mükafatsız bitirib. Heç vaxt ilk "altılıq”dan kənar düşməyən qəbələlilər 2014/2015 mövsümünü 4-cü, 2012/2013 mövsümünü 5-ci, 2008/2009 mövsümünü 6-cı pillədə başa vurub.
Cari mövsümdə bütün göstəricilərdə rəqiblərindən üstün olan "Qəbələ” 32 matçda 82 qol vurub. Komandanı çempionluğa daşıyan qollara aşağıdakı futbolçular imza atıblar: Ehtiram Şahverdiyev 20, Ramil Hasanov 17, Ülvi İsgəndərov 10, Roman Hüseynov 5, Vadim Abdullayev 4, Ülvi İbazadə və Vüqar Nadirov hərəyə 3, Bəhlul Mustafazadə, Rövlan Muradov, Şamil Camaləddinov, Vəzir Musayev, Sahil Mirzəyev hərəyə 2, Ayxan Əsədov, Baxşəli Baxşəliyev, Emin Zamanov, Murad Musayev, Tural Məmmərzəyev, Yusif Dilanov, Muxtar Əliyev hərəyə 1 qol vurublar. Aydın Bayramov ("Rəvan”), Əli Əliyev və Yusif Həsənov (hər ikisi "Xəzər Lənkəran”) "qırmızı-qaralar”la oyunlarda avtoqol müəllifi olublar.
15 oyundur uduzmayan Ramin Quliyevin yetirmələri ardıcıl 6-cı qələbəsini qazanıb. Son 4 turda qol buraxmayan əvəzedicilər ardıcıl 3-cü dəfə 3 xalı böyük hesabla əldə edib.
