"Qəbələ"nin Avropa Liqasına hazırlığı Gürcüstanda keçirəcək. Klubun baş meneceri Zaur Əzizov Sportnet.az-a açıqlamasında qonşu ölkədə 10 günlük təlim-məşq toplanışı keçəcəklərini bildirib. Toplanışın tarixi iyunun 16-dan 26-dək olacaq: "Gürcüstanı seçməyimizin bir sıra səbəbləri var. Əvvəla, yaxındır, ora birbaşa reys var. Bundan əlavə, Gürcüstanda yaxşı şərait, yoxlama matçları keçirməyə rəqiblər var. Orada iki yoxlama oyunu keçirəcəyik. Rəqiblər Bolnisinin "Sioni" və Qorinin "Dila" klublarıdır".
İyunun 20-də keçriləcək Avropa Liqasının püşkündən sonra "qırmızı-qaralar"ın gələcək planlarına aydınlıq gələcək. Yəni Roman Qriqorçukun komandası ilk matçını səfərdə keçirsə, birbaşa həmin ölkəyə yollanacaq, əks halda Bakıya qayıdacaq.
Xatırladaq ki, "Dila" da son mövsümün yekununa görə "Qəbələ" kimi öz çempionatınının bürünc medalçısıdır və Avropa Liqasında çxış edəcək.
