"Kəpəz"in baş məşqçisi Şahin Diniyev ötən mövsümü "Rəvan"da keçirmiş hücumçu Yasin Həmidin transferi variantına münasibətini bildirib. Təcrübəli mütəxəssis Sportnet.az-a açıqlamasında bildirib ki, 23 yaşlı legionerin keçidini həll etdikləri xəbəri həqiqətəuyğun deyil.
Diniyevin sözlərinə görə, Ukrayna vətəndaşı olan Hamid, ümumiyyətlə, transfer siyahılarında olmayıb: "Həmid maraq dairəmizdə olmayıb. Mən də mətbuata - qəzetə, saytlar baxıram ki, Yasinin artıq "Kəpəz"ə keçdiyini yazıblar. Bu, düz deyil. Bizim futbolçu olsaydı, rəsmən açıqlayardıq. Ancaq Həmidlə heç maraqlanmamışıq".
