"Qəbələ" klubunun vitse-prezidenti Fariz Nəcəfov jurnalistlərin suallarını cavablandırıb. Sportnet.az həmin müsahibəni təqdim edir.
- Avropa Liqasındakı nəticələrlə əlaqədar təəssüf hissi keçirmirsiniz?
- Xeyr, Avroliqada ardıcıl ikinci mövsüm iştirakımız bizim üçün böyük təcrübə oldu. İldən-ilə komandamızın daha yaxşı çıxış etməsini, öz oyun üslubunu yaxşılaşdırmasını müşahidə edirik. Ötən il başqa komanda idi, çıxışı da fərqli idi. Bu il isə daha xoşagəlimli oyun sərgiləyirik. Nəticəmizin də belə alınacağını gözləmirdik. Amma uduzduğumuz oyunların hamısını yüksək səviyyədə keçirmişik. Bəzi oyunlarımızı futbolçularımızın fərdi səhvləri üzündən uduzmuşuq. Amma komanda kimi uğurla çıxış edirik. Burada da zədəlilərimiz oyunumuza təsirsiz ötüşmədi. Bəzi mövqelərdə futbolçuların çatışmaması özünü göstərdi və nəticəmiz belə uğursuz alındı. Qrupdan çıxma şanslarımız tam tükənib. Amma qarşıdakı 2 oyuna komandamız tam gücü ilə çıxacaq. Çünki burada həm reytinq məsələsi var, həm də klub olaraq, ölkəmizi layiqincə təmsil etmək istəyirik.
- Bir neçə tur əvvələdək "Qəbələ" ən yaxın izləyicilərindən böyük xal fərqi ilə irəlidə idi. Amma indi "Qarabağ" liderliyinizə şərik olub. Fərqin aradan qaldırılması sizi narahat etmir?
- Sözsüz ki, narahat edir. Komandamızın daim xal fərqində önə çıxmasını istərdik. Amma bu, gözlənilən haldır. Çünki çempionat uzun marafondur. Xal fərqinin aradan qalxmasının subyektiv və obyektiv səbəbləri var. Dəfələrlə məşqçilər korpusu və futbolçularımızla görüşümüz olub. Hamı əlindən gələni etməyə çalışır. Məqsədimiz bəllidir və axıradək mübarizə aparacağıq.
- Qış fasiləsində yeni tansferlər olacaq?
- Bəli. Bəzi mövqeləri gücləndirmək istəyirik. Avroliqadan əldə etdiyimiz gəlirin bir hissəsini futbolçu transferlərinə xərcləmək niyyətindəyik. Buna görə də axtarışlarımız davam edir.
- Hansı mövqelərə yeni oyunçu almağı düşünürsünüz?
- Baş məşqçimiz Roman Qriqorçuk bir neçə mövqedə oynaya bilən futbolçulara üstünlük verir. Məsələn, bura hücumda, yarımmüdafiənin sağ və solunda oynaya bilənlər aiddir. Axtarışlarımız o istiqamətdə gedir.
- "Qəbələ" bütün mövsümlərə yaxşı başladığı halda sonradan eniş olur. Bu, nə ilə bağlıdır?
- Təkcə futbolda deyil, fərdi növlərdə də idmançının yüksəliş və eniş dövrləri olur. Təlim-məşq toplanışından sonra komandamızda yüksəliş var idi. Lakin yenə də eyni səbəbdən - bəzi zədəli futbolçularımızın olması, idman şansımızın çatışmaması üzündən eniş baş verib. Əslində buna eniş demək olmaz. Qələbə qazanmalı olduğumuz müəyyən oyunlarda xal itirmişik. Yəqin ki, qarşıdakı oyunlarda bunun yerini doldurmağa çalışacağıq.
- Ruslan Əmircanova olan borcunuzun qaytarılması barədə AFFA qərar çıxarıb. Futbolçuya 40 min manatın ödənilməsi təmin olunub?
- Onunla şəxsən görüşmüşəm. Məsələ öz aramızda həll olunub. Amma hələ pul ödənilməyib. 40 min manat olmasa da, müəyyən miqdarda vəsait yaxın vaxtlarda ödəniləcək.
