Bu həftə startı veriləcək Avropa Liqasının pley-off mərhələsində maraqlı qarşıdurma olacaq. Sportnet.az-ın məlumatına görə, bu, fransalı futbolçuların - Poqba qardaşlarının duelidir.
Fevralın 16-da "Old Trafford"da 1/16 final mərhələsinin ilk oyunları çərçivəsində keçiriləcək "Mançester Yunayted" - "Sent-Etyen" oyununda Poqba ilə Florentin meydanda rəqib kimi üzləşəcəklər.
Məlum olduğu kimi, dünyanın ən bahalı futbolçusu olan 23 yaşlı Pol Poqba Mançester təmsilçisində, Florentin Poqba isə vətənində oynayır. Joze Mourinyonun baş məşqçisi olduğu komanda "Fənərbağça"nın lider olduğu qrupdan 2-ci yerlə çıxaraq "Feyenoord"la "Zarya"nı qabaqlayıb. "Sent-Etyen" isə Azərbaycan təmsilçisi "Qəbələ" ilə bir qrupda yer alıb. Bu qrupda 1-ci yeri tutan fransızların digər rəqibləri "Anderlext"lə "Maynts" idi.
"Sent-Etyen" "Qəbələ"ni evdə 1:0, səfərdə 2:1 hesabı ilə məğlub edib. Florentin bu matçların iştirakçısı olub. O, hətta "Bakcell Arena"dakı matçın 28-ci dəqiqəsində sarı vərəqə alıb.
Qeyd edək ki, Florentin "Mançester Yunayted"in "Yuventus"dan 105 milyon abvroya aldığı Poldan 3 yaş böyükdür. Onun əkiz qardaşı Matias da futbolçudu rvə Hollandiyanın "Sparta" klubunda çıxış edir.
