Topaz Premyer Liqasında XXIV turun son görüşləri keçirilib.
Sportnet.az-ın məlumatına görə, "Qarabağ" səfərdə "Sumqayıt"ı 1:0 hesabı ilə yenib. Bununla da Ağdam komandası vaxtından əvvəl çempionluğunu rəsmiləşdirib.
"Report"un məlumatına görə, Ağdam təmsilçisi Səfərdə Dani Kintananın 34-cü dəqiqədə cərimə zərbəsindən vurduğu qolla qalib gələn Qurban Qurbanovun komandası xallarını 59-a yüksəldib.
Bununla da "Qarabağ" mövsümün başa çatmasına 4 tur qalmış 42 xalla 2-ci pillədə qərarlaşan "Qəbələ" üçün əlçatmaz olub.
Eyni saatda start götürən "Neftçi" - "Qəbələ" görüşündə isə meydan sahibləri qalib gəlib. Ruslan Abışovun 4-cü dəqiqədə vurduğu qolla Azərbaycan Kubokunun yarımfinalında uduzduğu rəqibini üstələyən "ağ-qaralar" xallarını 37-yə çatdırıblar və "Zirə"ni keçərək, 4-cü pilləyə yüksəliblər.
Qeyd edək ki, ilk oyun günündə "Keşlə" "Zirə"ni 2:1 hesabı ilə məğlub edib. Bu gün baş tutmuş "Səbail" - "Kəpəz" qarşılaşmasında isə qalib müəyyənləşməyib.
_____________________________________________________________________________________________________
Topaz Premyer Liqasında XXIV turun daha bir görüşü keçirilib.
Sportnet.az-ın məlumatına görə, "Səbail" "Bayıl Arena"da "Kəpəz"i qəbul edib. Görüş 1:1 hesablı heç-heçə ilə yekunlaşıb. Hesabı qonaqlar açıb. Dario Frederiko 19-cu dəqiqədə Gəncə təmsilçisini önə keçirib. Lakin bundan 5 dəqiqə sonra "Səbail"in legioneri Faruk Miya bərabərlik qolunu vurub.
Bu nəticədən sonra "Səbail" 20 xalla 7-ci, "Kəpəz" 13 xalla 8-ci pillədə qalıb.
Qeyd edək ki, turun ilk matçında "Keşlə" "Zirə"ni 2:1 hesabı ilə məğlub edib. "Neftçi" - "Qəbələ" və "Sumqayıt" - "Qarabağ" matçları saat 19:00-da başlanıb.
--------------------------------------------------------
Bu gün Topaz Premyer Liqasında XXIV turun son 3 oyunu keçiriləcək.
Sportnet.az-ın məlumatına görə, əsas diqqətlər Sumqayıta yönələcək. Səbəb "Qarabağ”ın ardıcıl 5-ci, ümumilikdə 6-cı dəfə çempionluğu rəsmiləşdirmək ehtimalıdır. Bunun üçün Ağdam klubunun səfərdə qış fasiləsindən sonra Premyer Liqada uduzmayan "Sumqayıt”ı məğlub etməsi lazımdır. Lakin Azərbaycan Kubokunda mübarizəni dayandıran meydan sahibləri avrokuboka düşməkdən ötrü hazırda 39 xalla qərarlaşdıqları 3-cü pilləni qorumaq niyyətindədirlər.
"Sumqayıt” əvvəlki 23 oyundan 4-də qələbə qazandığı halda, 16 dəfə "Qarabağ” qələbəni bayram edib. Ardıcıl 10 matçdır meydanı qolsuz tərk etməyən Ağdam klubu bu matçlarda məğlub olmayıb.
Qurban Qurbanovun rəhbərlik etdiyi kollektiv "Gənclər şəhəri”ndə 3 xal qazanmadan da çempionluğu bayram edə bilər. Bunun üçün eyni vaxtda start götürəcək "Neftçi” – "Qəbələ” duelində qonaqların xal itirməsi şərtdir.
"Qırmızı-qaralar” aprelin 18-də Azərbaycan Kubokunun yarımfinal mərhələsinin cavab görüşündə "Neftçi”ni 3:1 hesabı ilə məğlub edərək finala yüksəlib. Lakin 42 xalla 2-ci pillədə qərarlaşan qəbələlilərin mövqeyini itirmək qorxusu var. Avrokubok ümidi çempionata qalan "ağ-qaralar” üçün qələbə daha vacibdir. Hazırda 34 xalla 4-cü pillədə olan "Neftçi” durumunu yaxşılaşdırmaqdan ötrü qalib gəlməlidir.
Əvvəlki 39 oyundan 16-da "Neftçi”, 15-də isə "Qəbələ” 3 xala sevinib. Bakılılar son 4 matçı qolsuz tərk etməyib. "Ağ-qaralar” son 8 ev oyununda yalnız 1 qələbə qazanıblar.
Turun digər oyunu isə alt pillələrdə qərarlaşan "Səbail” və "Kəpəz” arasında olacaq. Meydan sahibləri 19 xalla 6-cı, qonaqlar isə 12 xalla sonuncu sıradadır. Komandalar arasındakı əvvəlki hər üç matçda minimal fərq qeydə alınıb. İki dəfə qələbə qazanan "Səbail” bütün matçlarda qol sevinci yaşayıb.
Topaz Premyer Liqası
XXIV tur
22 aprel (bazar)
17:00. "Səbail” – "Kəpəz” - 1:1
Qollar: Dario Frederiko, 19 - Faruk Miya, 24
Hakimlər: Ramil Diniyev, Elşən Acalov, Vüsal Qənbərov, Vüqar Həsənli
AFFA nümayəndəsi: Seymur Səlimli
Hakim-inspektor: Fazil Mürşüdov
Bakı. "Bayıl Arena”
İlk üç dövrə - 1:0, 3:2, 1:2
19:00. "Sumqayıt” – "Qarabağ” - 0:1
Qol: Dani Kintana, 33
Hakimlər: Ömər Paşayev, Namiq Hüseynov, Mübariz Haşımov, Rauf Cabbarov
AFFA nümayəndəsi: Məmmədəli Məmmədov
Hakim-inspektor: Şahin Cəfərov
Sumqayıt. "Kapital Bank Arena”
İlk üç dövrə - 1:4, 0:2, 1:1
19:00. "Neftçi” – "Qəbələ” - 1:0
Qol: Ruslan Abışov, 4
Qırmızı vərəqə: Emin Mahmudov, 62
Hakimlər: İnqilab Məmmədov, Rza Məmmədov, Vaqif Musayev, Əliyar Ağayev
AFFA nümayəndəsi: Ramiz Mustafayev
Hakim-inspektor: Xaqani Məmmədov
Bakı. "Bakcell Arena”
İlk üç dövrə - 1:2, 2:3, 2:1
