Kolumbiyada keçirilən futzal üzrə dünya çempionatında 1/4 final mərhələsinə daha 3 vəsiqənin sahibi müəyyənləşib. Sportnet.az-ın məlumatına görə, Azərbaycanla eyni qrupda mübarizə aparmış İran gecənin sensasiyasına imza atıb.
Qonşu ölkə yığması 1/8 finalda son düya çempionu Braziliyanı mübarizədən kənarlaşdırıb. Görüşün əsas vaxtında 2:2 hesablı heç-heçə qeydə alınıb. Əlavə vaxtda tərəflər hərəyə bir dəfə fərqləniblər. Penaltilər seriyasında isə İran daha dəqiq olub - 3:2. Qalib komandanın növbəti mərhələdə rəqibi daha öncə bu vəsiqəyə yiyələnmiş Paraqvay olacaq.
Son vitse-çempion İspaniya isə Qazaxıstanı 5:2 hesabı ilə üstələyərək, 1/4 finalda Rusiyaya rəqib olub.
Azərbaycan millisinə gəldikdə, bu gecə Tailand üzərində qələbə qazanacağı təqdirdə, növbəti rəqibi Portuqaliya olacaq. Pireneylilər 1/8 finalda Kosta Rikanı məğlubiyyətə uğradıb - 4:0.
Qeyd edək ki, son 3 1/4 finalçı bu gecə müəyyənləşəcək. Azərbaycan - Tailand görüşündən başqa, İtaliya Misiri, Argentina Ukraynanı sınağa çəkəcək.
