Aprelin 28-də Bakıda start götürəcək Dünya Kubokunun mərhələ yarışlarında mübarizə aparacaq bədii gimnastika üzrə Azərbaycan milli komandasının heyəti açıqlanıb.
Azərbaycan Gimnastika Federasiyasından Sportnet.az-ın verilən məlumata görə, turnirdə 2016-cı il Rio-de-Janeyro Yay Olimpiya Oyunlarının çoxnövçülük üzrə finalçısı, "Bakı 2015” I Avropa Oyunlarının gümüş, Avropa çempionatının bürünc medalçısı Marina Durunda, yeniyetmələr proqramında Avropa çempionatının gümüş və bürünc medalçısı Jalə Piriyeva, həmçinin Avropa çempionatının qrup hərəkətləri komandasının tərkibində gümüş medalçılar Siyana Vasileva, Diana Doman, Aleksandra Platonova, Ayşən Bayramova və Elif Zeynep Celep çıxış edəcəklər.
Yarışların ilk iki günü baş tutacaq təsnifat mərhələlərinin nəticələrindən asılı olaraq, həm fərdi gimnastlar, həm də qrup hərəkətləri komandaları arasında çoxnövçülük üzrə qaliblər və ayrı-ayrı alətlər üzrə finalçılar müəyyənləşəcək. Finallar isə turnirin son günü keçiriləcək.
Qeyd edək ki, yarışlarda 21 ölkədən 92 gimnastın iştirak edəcəyi gözlənilir. Onlardan 34 nəfəri fərdi proqramda, 58 nəfəri isə ümumilikdə 10 qrup hərəkətləri komandasının tərkibində çıxış edəcək.
Milli Gimnastika Arenasında keçiriləcək turnirə biletləri Arenanın kassasından, "Bazarstore" mağazalar şəbəkəsinin Xətai və "28 mall" filiallarından əldə etmək mümkündür. Biletlərin qiyməti təsnifat günləri üçün 5, 8, 12, final günləri üçün isə 10, 15, 20 manat təşkil edir. Yarışlar saat 12:00-da başlayacaq.
