"Neftçi"nin "Sumqayıt"dan transfer etdiyi futbolçu Məhəmməd Qurbanov fikirlərini bölüşüb. Sportnet.az-ın məlumatına görə, 23 yaşlı hücumçu flaqmanın rəsmi saytına açıqlamasında yeni komandasını Azərbaycanın ən köklü klubu adlandırıb.
"Təbii ki, hər bir futbolçu iddialı komandada oynamaq istəyər. Mən də istisna deyiləm. Çalışacağam ki, "Neftçi"də özümü ən yaxşı tərəfdən göstərim" deyən Qurbanovun fikrincə bu transfer onun milli komanda karyerasına da müsbət təsir edəcək.
Qarşıda "Neftçi"ni yoxlama oyunları və Avropa Liqasının gözlədiyini deyən Qurbanov azarkeşlərin də dəstəyi ilə qarşıya qoyulan məqsədlərə çatacaqlarına inam ifadə edib.
Qeyd edək ki, "Neftçi" Avropa Liqasında Çernoqoriya "Mladost"u ilə qarşılaşacaq. I təsnifat mərhələsinin ilk görüşü iyulun 2-də Podqoritsada, cavab qarşılaşması isə iyulun 9-da Bakıda olacaq.
