Azərbaycanın futbol hakimlərinin Türkiyənin Antalya bölgəsində keçirilməsi nəzərdə tutulan ənənəvi qış təlim-məşq toplanışı ləğv olunub. Bu barədə "Report"a AFFA Hakimlər Komitəsinin sədri Xaqani Məmmədov məlumat verib.
X.Məmmədovun sözlərinə görə, hakimlər qış toplanışını Bakıda keçirəcək Premyer Liqa klublarının yoxlama görüşlərini idarə edəcəklər: "Bizə lazımdır ki, oyunlar idarə edək. Klublarımızdan bir neçəsi Bakıda qalacaq. İnanıram ki, hakimləri sınaqdan keçirmək üçün kifayət qədər oyun olacaq".
Komitə sədri Antalya toplanışının ləğv edilmə səbəblərini də açıqlayıb: "Çətinliklər var. Amma bir amili də nəzərə almaq lazımdır ki, Rusiya - Türkiyə münasibətlərinə görə, rusların xeyli sayda klubu Türkiyəyə gəlməyəcək. Bu da qış təlim-məşq toplanışı üçün Antalyaya az sayda komandanın gələcəyini deməyə əsas verir. Üstəlik, planın dəyişməsinə dolların məzənnəsinin qalxması da səbəb oldu".
Qeyd edək ki, azərbaycanlı hakimlər 2009-cu ildən qış toplanışını Antalyada keçirirdilər.
