"İnter"in prezidenti Georgi Nikolovun Moldova "Tiraspol"u ilə Avropa Liqasının I təsnifat mərhələsinin cavab görüşündən sonra Sportnet.az-a müsahibəsi
- Oyun haqda nə deyə bilərsiniz?
- Mən xoşbəxtəm. Ona görə ki, "İnter" meydanda özünü sübut etdi və qələbə qazandı. Oyuna yaxşı başlamasaq da, sonra dönüş etmək mümkün oldu. Düzdür, bizim üçün bir az gərgin oyun keçdi. Ancaq futbolçular "İnter"ə məxsus xarakter nümayiş etdirərək lazım olan nəticəni qazandılar.
- Növbəti mərhələdə İsveçin "Elfsborq" klubu ilə qarşılaşacaqsınız...
- "Elfsborq" bir mərtəbə yuxarı komandadır. Ancaq bu mərhələdə dayanmağımız daha bəsdir. Azarkeşlər və özümüzü sevindirmək üçün mərhələ keçməliyik. Bu səbəbdən "Tiraspol"a qarşı göstərdiyimiz xarakteri "Elfsborq"la matçda da nümayiş etdirməliyik.
- "İnter"in müdafiəçilərii bu görüşdə çox ağır hərəkət edirdi. Demək olar ki, lazımınca qaçmırdılar. Bu, onların hazır olmamağından irəli gəlir?
- Xeyr, müdafiəçilərin meydandakı oyunu sizə ağır gələ bilər. Ancaq bu onların təcrübəsi ilə bağlıdır. Yəni, onlar çox qaçıb özlərini yormurlar. Müdafiədə problemimiz yoxdur. Lakin bizə hücumçu lazımdır və axtarırıq.
- Özünüz də qeyd etdiniz ki, hücumçu lazımdır. Baş məşqçi də yeni hücumçuya ehtiyac olduğunu bildirib...
- Bəli, bizim komandaya yeni hücumçu lazımdır. Təssüf ki, o hücumçular küçədə gəzmirlər. Ona görə də tapmaqda çətinlik yaranır. Hələ ki, forvard tapmamışıq.
- Mərhələ keçəcəyiniz təqdirdə səfərə daha geniş təyyarə ilə gedəcəyiniz bildirmişdiniz...
- Bu bizimlə bağlı olan məsələ deyil. Buna AZAL şirkəti baxır.
- Artyom Xaçaturov gəlmədi. Ancaq gəlsəydi, nə baş verərdi?
- (Gülür).. Artyom gəlmədi, vəssalam. Heç nə də baş vermədi.
- "İnter" azarkeşlərinə sözünüz var?
- Azarkeşlərin dəstəyi bizə çox lazımdır. Təbii ki, medianın da rolu böyükdür. Sizin vasitənizlə "İnter"sevərlərə demək istəyirəm ki, stadiona gəlib, komandalarına dəstək versinlər.
Rövşən Əhlimanoğlu
