Azərbaycanlı iş adamı Mübariz Mənsimov İngiltərənin "Çelsi" klubunun futbolçusu Demba Banın Türkiyə "Beşiktaş"ına transferinə vasitəçilik edəcək. Sportnet.az-ın qardaş ölkə mətbuatına istinadən məlumatına görə, Mənsimov yaxın vaxtlarda "Çelsi"nin sahibi olan yaxın dostu Roman Abramoviçlə Bodrumda görüşəcək.
Daha öncə "qara qartallar"ın prezidenti Fikrət Orman "zadəganlar"ın baş direktoru Ron Qurleylə görüşərək, Banı istədiklərini bildirib. Həmyerlimiz isə rusiyalı milyarderi seneqallı hücumçunu "ağ-qaralar"a verməsi üçün razı salmağa çalışacaq.
Hazırda "Çelsi"nin hücum xəttində Fernando Torres və ötən mövsüm icarə əsasında "Everton"da uğurla çıxış etmiş Romelu Lukaku yer alıb. "Zadəganlar" az öncə İspaniya "Atletiko"sundan Dieqo Kostanı da 40 milyon avroya alıblar. Bu isə o deməkdir ki, Baya London klubunda 4-cü hücumçu kimi baxılır və onun başqa komandaya verilməsi mümkündür.
Qeyd edək ki, "Xəzər Lənkəran"ın fəxri prezidenti olan Mübariz Mənsimov Türkiyədə "Kasımpaşa"nın idarə heyətinin üzvü olsa da, "Beşiktaş"a bağlılığı ilə tanınır.
