Bu gün Çempionlar Liqasının 2-ci təsnifat mərhələsində Maltanın "Valletta" klubu ilə qarşılaşacaq Ağdamın "Qarabağ" klubunun baş məşqçisi Qurban Qurbanov səfərdə baş tutacaq ilk oyunla bağlı fikirlərini bölüşüb. Sportnet.az-ın klubun rəsmi saytına istinadən məlumatına görə, təcrübəli mütəxəssis oyuna nəzarət etməyə çalışacaqlarını bildirib.
Ötən mövsümlə müqayisədə rəqibin heyətində xeyli dəyişikliyin baş verdiyini qabardan Qurbanov "Valletta"nın yeni transferlərinin əhəmiyyətindən danışıb: "Komandaya yaxşı oyunçular cəlb ediblər, vazifəyə yerli və gənc məşqçi gəlib. Klubun prezidenti özü açıqlama verib ki, daha yaxşı komanda təşkil etmək istəyir. Gördüyü işlər, elədikləri transferlər də bu istəyi əks etdirir. Yeni transfer olunan oyunçular Malta milli komandasından, Avstraliyadan, Portuqaliyadan, Yunanıstan liqasından transfer olunublar. Keçən il Avropa Liqasında yaxşı təcrübə qazanmış bir komandadır. Kimlərsə fikirləşə bilər ki, bizim üçün asan rəqibdir, lakin düşünürəm ki, bu səhv düşüncədir. Çünki, rəqibimiz çox təcrübəlidir, nəticəyə oynaya biləcək futbolçuları çoxdur. Xüsusi ilə orta xətti vurğulamaq istəyirəm. Ayrıca, baş məşqçilərinin də yeni olmasını nəzərə alıb, ilk dəqiqələrdən rəqibin oyun üslubunu çözməyə və qapımızı toxunulmaz saxlamağa çalışacağıq. Və ardınca da çalışacağıq ki, oyunun nəzarətini ələ alaq. O ki qaldı nəticəyə, minimal hesablı qələbə və ya bərabərlik bizi qane edər".
Qeyd edək ki, "Valletta" - "Qarabağ" qarşılaşması bu gün Bakı vaxtı ilə saat 21:30-da start götürəcək.
