Rusiyanın "Rubin" klubunun rəsmi saytı növbəti mövsüm heyətdə yer alacaq futbolçuları açıqlayıb. Sportnet.az-ın məlumatına görə, Azərbaycan yığmasının müdafiəçisi Ruslan Abışov komanda üzvləri siyahısından çıxarılıb.
26 nəfərlik siyahıda yer almayan Abışovun "Qəbələ"yə icarəyə verilməsinə dair saytda heç bir xəbərə də rast gəlinmir. Halbuki heyətdəki digər futbolçularla bağlı yenilikləri izləmək mümkündür. Bu isə "Rubin"in yığmamızın futbolçusuna laqeyd münasibətindən xəbər verir.
Kazan təmsilçisi rəhbərliyinin Abışova belə yanaşmasını təsdiqləyən daha bir olay isə o, "Qəbələ"yə icarəyə verildiyi vaxt yaşanıb. Müqavilə ilə məxsus olduğu klub futbolçunun transfer vərəqini Avropa Liqası üçün sifariş ərizəsinin son təqdim edilmə vaxtından bir neçə saat əvvəl göndərib.
Qeyd edək ki, Ruslan Abışov "Rubin"lə 2013-cü ilin fevralında 2,5 illik müqavilə bağlayıb. Onun Kazan klubu ilə anlaşmasının bitiminə hələ 1 il qalıb.
