Türkiyə güləşində skandal baş verib. Sportnet.az-ın məlumatına görə, S.Ç.D adlı qız güləşçi Türkiyə Güləş Federasiyası nümayəndəsi O.Ç. tərəfindən təcavüzə uğradığını bildirib.
17 yaşlı güləşçiyə qarşı təcavüzün sosial media üzərindən həyata keçirildiyi və əxlaqsız mesajların yazıldığı söylənilib. Məsələ ilə bağlı federasiya prezidentinə şikayətini bildirdiyini deyən qızın atası sözügedən şəxsi öldürməyə qərar verdiyini, lakin yaxınları tərəfindən fikrinin dəyişdirildiyini söyləyib. O, məhkəməyə müraciət etdiyini bildirib.
Təqsirləndirilən O.Ç. isə haqqında deyilənlərin böhtan olduğunu açıqlayıb: "O, mənə "Facebook"da dostluq göndərdi və mən də qəbul etdim. Bir müddət sonra mesajlaşmağa başladıq. Mən ona idman həyatında necə uğurlu olacağını izah edirdim. Sonra güləş partnyorunun olub-olmamasını soruşdum və bunu başqa mənalara yozurlar. Bir gün qız mənə "Necə qızlardan xoşun gəlir?" sualını verdi. Bu mesajdan sonra onu dostluqdan sildim. Onsuz da iyunda məhkəməmiz var. Orada bütün baş verənləri danışacam".
