Şüvəlandakı Ağır Atletika Akademiyasında keçirilən Azərbaycan birinciliyində 15 və 17 yaşadək oğlanlar arasında 49 kq çəki dərəcəsində qaliblərin adına aydınlıq gəlib.
Azərbaycan Ağır Atletika Federasiyasının (AAAF) mətbuat xidmətindən Sportnet.az-a verilən məlumata görə, toplam 141 kq (63+78) nəticə göstərən Orxan İmanov yaşı 15-ə qədər olan atletlər arasında qızıl medala yiyələnib. 120 kq-ın (55+65) öhdəsindən gələn Nihat Zairov isə 17 yaşlılar arasında hamıdan güclü olub.
Qeyd edək ki, yarışa mayın 15-də yekun vurulacaq.
---------------------------------------------
Şüvəlandakı Ağır Atletika Akademiyasında 15 və 17 yaşadək yeniyetmə oğlan və qızlar arasında Azərbaycan birinciliyinə start verilib.
Azərbaycan Ağır Atletika Federasiyasının (AAAF) mətbuat xidmətindən Sportnet.az-a verilən məlumata görə, yarışda ölkənin bütün şəhər və rayonlarından idman cəmiyyətləri, klubları, mərkəzləri, UGİM-ləri təmsil edən 150-dək gənc atlet iştirak edir.
İlk yarış günündə qızların mübarizəsində bütün çəki dərəcələrində, 15 yaşadək oğlanlarda 49 kq və 55 kq, həmçinin, 17 yaşadək oğlanlarda 49 kq çəki dərəcəsində qaliblərin adlarına aydınlıq gələcək.
Artıq ilk mükafatçılar müəyyənləşib. Yaşı 15-dək olan qızlar arasında 40 kq çəki dərəcəsində Gülşən Hüseynova, 49 kq-da Türkan Qənbərzadə, 64 kq-da Zəhra Niftəliyeva, 76 kq-da Arzu Qədimova, yaşı 17-dək olan qızlar arasında isə 49 kq-da Selcan Qarayeva, 76 kq-da Rəhilə Hüseynzadə qızıl medala layiq görülüb.
Yarışın keçirilməsində məqsəd ağırlıqqaldırmanın şəhər, rayon, qəsəbə, kəndlərdə təbliği və inkişafı, idmançıların ustalıq səviyyəsinin artırılması və təkmilləşdirilməsi, şəhər və rayonlarda, idman cəmiyyətlərində, klublarda və mərkəzlərdə inkişaf səviyyəsinin müəyyənləşdirilməsi, perspektivli yeniyetmə ağırlıqqaldıranların aşkar olunması, yeniyetmə oğlan və qızlardan ibarət yığmaların tərkibinin müəyyənləşdirilməsi, beynəlxalq yarışlara hazırlanmasıdır.
