"Qəbələ" klubunun sabiq futbolçusu Kristian Pulhak Rumıniyanın "Dinamo" (Buxarest) komandasında çıxış etdiyi dövrlə bağlı şok fakt açıqlayıb. Sportnet.az-ın məlumatına görə, hazırda Polşa "Zavışa"sında çıxış edən sol cinah müdafiəçisi 2007-2008-ci il mövsümündə Çempionlar Liqasının III təsnifat mərhələsində "Dinamo"nun İtaliya "Latsio"su ilə cavab görüşünün danışılmış olduğuna işarə vurub.
O deyib: "Heç kimi ittiham etmirəm, amma kimsə bunu edibsə, həyatda gec-tez cəzasını çəkəcək. Ya futbolda, ya da hardasa onu Allah cəzalandıracaq".
Bu müsahibədən az sonra "Dinamo"nun adının çəkilməsini istəməyən sabiq səhmdarı 2007-ci il avqustun 28-də keçirilmiş qarşılaşmanın həqiqətən də danışılmış olduğunu təsdiqləyib. O bildirib ki, iki klub arasında razılıq "Latsio"nun qaldığı oteldə oyundan öncə əldə edilib. Rumıniya və İtaliya klublarının prezidentləri İoan Bekali ilə Claudio Lotito ilə nahar zamanı məsələni həll ediblər.
Matça gəldikdə, "Dinamo" ilk görüşdə Romadan 1:1 hesablı heç-heçə ilə ayrıldığından, cavab görüşündə müəyyən üstünlüyə sahib olub. Cavab qarşılaşmasının birinci hissəsindən sonra Buxarest komandası 1:0 hesabı ilə öndə olub. 27-ci dəqiqədə Florin Bratu fərqlənib. Lakin fasilədən sonra meydan sahibləri ardıcıl kobud səhvlərə yol verərək, "Latsio"nun 3 qol vurmasına səbəb olublar. Bununla da 1:3 hesabı ilə uduzan "Dinamo" tarixində ilk dəfə vəsiqə qazanmağa çox yaxın olduğu Çempionlar Liqasının qrup mərhələsindən kənarda qalıb.
Keçmiş səhmdarın sözlərinə görə, məhz fasilə zamanı meydan sahiblərinə tapşırıq verilib ki, qonaqların fərqlənməsinə şərait yaratsınlar. Əvəzində "Latsio" qrup mərhələsinə vəsiqə qazandıqdan sonra teleyayım hüququnun satışından 16,5 milyon avro qazanıb və müdafiəçi Stefan Radunun transferi qarşılığında "Dinamo"nun hesabına 4,5 milyon avro köçürüb. Keçmiş səhmdar bildirib ki, həmin vaxt Radu bu qiymətə layiq olmayıb.
Qeyd edək ki, "Latsio" ilə oyuna "Dinamo"nu sonradan "Xəzər Lənkəran"ın baş məşqçi postunu tutan Mirça Rednik çıxarıb. Heyətdəki futbolçuların bir çoxu isə növbəti illərdə Azərbaycanın müxtəlif klublarının şərəfini qoruyub. Cavab görüşünə əsas heyətdə çıxmış futbolçular arasında Pulhakdan əlavə, 2009-cu ildə "Bakı"ya keçən Daniel Opritsa və ötən ildən "Qəbələ"də oynayan Adrian Ropotan da olub. Fasilədən sonra Opritsa yerini 2011-ci ildə "Xəzər Lənkəran"ın formasını geyinmiş Xristu Kyakuya verib. Lənkəran komandasına 2010-cu ildə transfer olunmuş qapıçı Denis Romanov isə "Latsio" ilə qarşılaşmada ehtiyat qapıçı olub.
İkinci hissənin elə ilk dəqiqəsində "Dinamo"nun müdafiəçisi Vasile Nestase topu itirdikdən sonra səhvini düzəltmək istərkən, "Latsio"nun futbolçusu Simone Del Nerini yıxıb və Tommazo Rokki penaltini dəqiq yerinə yetirib. 53-cü dəqiqədə Andrey Marqaritesku meydanın mərkəzində topu itirib və əks-hücum nəticəsində Qoran Pandev qonaqları hesabda irəli çıxarıb. Bundan 5 dəqiqə sonra Rednik 2 futbolçu əvəzləməsinə əl atıb. 66-cı dəqiqədə "Latsio" "Dinamo"nun süni ofsayd yaratma cəhdini puça çıxarıb və Rokki matçda son nöqtəni qoyub.
