Avropa Cüdo Birliyinin rəsmi saytında Azərbaycanda katanın inkişafından bəhs edən məqalə dərc olunub.
Sportnet.az-ın məlumatına görə, yazıda katanın inkişafının bu ölkədə ardıcıl şəkildə davam etdiyi vurğulanıb.
Bu istiqamətdə ölkə çempionatı ilə yanaşı, kata hakimləri üzrə seminarın da təşkil olunduğu bildirilir:
"Ötən həftə Azərbaycan ilk Milli Kata Çempionatını keçirib və eyni zamanda ölkənin ilk kata hakimləri lisenziyalaşıb.
Çempionatda Nage-no-kata üzrə kədet, junior və senior kateqoriyaları üzrə yarışlar təşkil olunub. Azərbaycan komandası EJU Kata Tourda ilk tarixi medalını qazanaraq uğurunu beynəlxalq səviyyədə təsdiqləyib.
Eyni zamanda, ölkədə uşaqlar üçün keçirilən “Kata for All” festivalları gələcək nəsillərin kata mədəniyyəti ilə tanış olmasına imkan yaradır. EJU nümayəndələri Azərbaycan katanın inkişafını yüksək qiymətləndirib və gələcəkdə bu sahənin daha da güclənəcəyini vurğulayıblar.
Azərbaycan katanın inkişafında tarixi mərhələni geridə qoyub və bu, yalnız başlanğıcdır".
Məqalədə, həmçinin federasiyanın kata mədəniyyətinin formalaşmasına verdiyi dəstək və beynəlxalq arenada qazanılan ilk kata medalına xüsusi yer ayrılıb.
