Azərbaycanın qadın boksçulardan ibarət yığma komandası Polşanın paytaxtı Varşavada Feliks Stammanın xatirəsinə həsr olunan beynəlxalq turnirdə çıxış edib.
Federasiyanın mətbuat xidmətindən Sportnet.az-a verilən məlumata görə, XXXIV dəfə təşkil olunan A kateqoriyalı ənənəvi yarışda Azərbaycanın 6 boksçusundan 2-si medal qazanıb.
Yığmanın lideri Anna Əlimərdanova bütün rəqiblərindən üstün olub. 57 kq çəki dərəcəsində çıxış edən Avropa Oyunlarının bürünc medalçısı finalda amerikalı Vendi Cesi ilə qarşılaşıb. 4:0 hesabı ilə qalib gələn Əlimərdanova qızıl medala yiyələnib.
Digər medalı Şəhla Allahverdiyeva qazanıb. 69 kq çəkidəki boksçu həlledici görüşdə almaniyalı Nadine Apitsə 0:5 hesabı ilə uduzub. Ümumi komanda hesabında Azərbaycan 23 ölkə arasında 2-ci yeri tutub.
Qeyd edək ki, digər boksçulardan Viktoriya İsmayılova (51 kq) ilə Məhsəti Həmzəyeva (57 kq) 1/8, Anaxanım Ağayeva (51 kq) və Yana Alekseyevna (60 kq) 1/4 finalda məğlubiyyətə üzülüb.
