Mayın 19-da Böyük Britaniyanın Mançester şəhərində start götürəcək taekvondo üzrə Avropa çempionatı üçün Azərbaycanın milli komandasının heyəti açıqlanıb.
Azərbaycan Taekvondo Federasiyasından Sportnet.az-a verilən məlumata görə, qurumun vitse-prezidentləri Nağı Səfərov və Niyaməddin Paşayev, kişilərdən ibarət milli komandanın baş məşqçisi Reza Mehmandoust və böyük məşqçi Sənan Həşimov, qadınlardan ibarət milli komandanın baş məşçisi Səbuhi Zülfüqarov və böyük məşqçi Rəşad Məmmədovun rəhbərliyi altında Azərbaycanı 13 idmançı təmsil edəcək.
Kişi taekvondoçulardan Səyyad Dadaşov (54 kq), Pərviz İsgəndərov (58 kq), Qaşım Maqomedov (63 kq), Cavad Ağayev (68 kq), Eltac Qafarov (74 kq), Taleh Süleymanov (-80 kq), Milad Hərçəqani (87 kq), və Radik İsaev (87 kq yuxarı) mübarizə aparacaq.
Qadınlardan Minayə Əkbərova (46 kq), Patimat Abakarova (49 kq), Röya Hacıyeva (53 kq), Fatimə Məcidova (57 kq) və Fəridə Əzizova (67 kq) dayanq üzərinə çıxacaq.
Parataekvondo komandasının da heyəti bəllidir. Qitə çempionatına qatılacaq millinin baş məşqçi Fərid Tağızadə və böyük məşqçi Yaşar Səfərovun yetirmələrindən Röyalə Fətəliyeva (47 kq), Sabir Zeynalov (58 kq), Sadiq Həmidov (63 kq), İmaməddin Xəlilov (70 kq) və Əbülfəz Abuzərli (80 kq) medallar uğrunda mübarizə aparacaq. Xatırladaq ki, paraetaekvondoçuların da Avropa çempionatı eyni məkanda keçiriləcək.
Çempionatda Azərbaycanı beynəlxalq dərəcəli referi Oh Kvanq Çeol və Ramal Camalov təmsil edəcək.
Qeyd edək ki, yarış dörd gün davam edəcək.
