"Zirə" Azərbaycan Premyer Liqasının VII turunda evdə "Neftçi" ilə 2:2 hesablı heç-heçə edib. Sportnet.az-ın məlumatına görə, qarşılaşmanın ardından "qartallar"ın baş məşqçisi Rəşad Sadıqov mətbuat konfransı keçirib.
43 yaşlı mütəxəssis əvvəlcə oyunu dəyərləndirib:
- Futbolçularıma təşəkkür etmək istəyirəm. Yüksək səviyyədə oyun keçirdilər. Nəticədən asılı olmayaraq, komandamdan keyfiyyətli və sanballı oyun gördüm. Keçənilki matça bənzədi. Sonluq çox dramatik alındı. 100 faizlik qol epizodları bizdə çox idi. Topun qapı xəttini keçib-keçmədiyini bilmirəm. Lakin həmin epizodun davamında rəqib qol vurdu. Futbolçularım irəli atıldılar, penalti ilə hesabı bərabərləşdirdik. Hər iki komanda baxımlı futbol oynamağa çalışırdı. Meydançanın vəziyyəti də yaxşı idi. Belə olan halda, oyunların keyfiyyəti də başqa səviyyədə olur. Futbolçulara layiq olduqları istirahəti verdik, 3-4 günlük dincələcəklər. Daha sonra toplanıb, növbəti oyuna hazırlaşacağıq. Ayron Qomisin qırmızı vərəqəsi bizi məyus etdi.
- Davit Volkovun yoxluğu nə ilə bağlıdı?
- Həm Volkov, həm İssa Cibrilla 5-6 həfə bizimlə olmayacaq. Onlar ötən tur "İmişli" ilə oyunda zədələniblər. Çox böyük itkilərdir. İkinci hissədə hücum xəttini gücləndirmək istəyirdik. Lakin sırf hücumçumuz yox idi.
- Yeqor Boqomolskini o vaxtdan çox istəyirdiniz. Ondan nə dərəcədə razısınız?
- Fərdi olaraq dəyərləndirsək, ümumən ondan razıyam. Etimadımızı doğruldur, çalışır, istəklidir. Hər oyunda 100 faizlik qol şansı olur. Bu gün də 3-cü dəqiqədə epizodu var idi, fərqlənə bilmədi. Belə davam etdikcə, inkişaf edərək, faydalı oyunçuya çevriləcək.
- Hücum xəttində sıxıntı görünür...
- Bu il hücum xəttində çox ciddi problemlər yaşayırıq. Rafael Utziq və Salifu Sumanın gedişindən sonra yeni zədəlilərimiz oldu. Brahim Konate dünən məşq etməmişdi, qızdırması var idi, amma məcburiyyətdən onu meydana buraxdıq. Hücum xəttində sıxıntılar yaşayırıq. Lakin düşünürəm ki, öhdəsindən gələcəyik.
