Bu gün UEFA Çempionlar Liqasının Liqa mərhələsində IV turun son 9 oyunu keçiriləcək.
Sportnet.az-ın məlumatına görə, Türkiyə təmsilçisi "Qalatasaray" "Qarabağ"ın rəqiblərindən olan Niderland "Ayaks"ına qonaq olacaq.
Hazırda İstanbul komandası 3 oyundan 6 xalla 16-cı yerdə gedir. Hələ xalı olmayan Amsterdam klubu isə sonuncu - 36-cı yerdə qərarlaşıb.
"Qarabağ"ın ilk turda məğlub etdiyi Portuqaliya "Benfika"sı Almaniya "Bayer"ini sınağa çəkəcək. "Benfika" da "Ayaks" kimi xalı olmayan 2 komandadan biridir və 35-ci yerdə gedir. 2 xala malik "Bayer" 29-cu pillədə qərarlaşıb.
Hələlik 1 xala malik Qazaxıstan "Kayrat"ı 3 oyundan maksimum xal toplamış İtaliya "İnter"inin qonağı olacaq.
Ötən tur "Qarabağ"ı 3:1 hesabı ilə məğlub etmiş "Atletik Bilbao" İngiltərədə "Nyukasl"la üz-üzə gələcək. 3 oyundan sonra turnir cədvəlində "Nyukasl" da Azərbaycan təmsilçisi kimi 6 xala malik komandaların siyahısına başçılıq edir. 3 xalı olan "Atletik Bilbao" 25-cidir.
Gecənin mərkəzi görüşü isə İngiltərədə "Mançester Siti" ilə Almaniyanın "Borussiya Dortmund" komandaları arasında olacaq. Hazırda həm Almaniya, həm də İngiltərə təmsilçisi hərəyə 7 xalla 8-9-cu yerləri tutur.
UEFA Çempionlar Liqası
Liqa mərhələsi, IV tur
5 noyabr
21:45. "Qarabağ" (Azərbaycan) – "Çelsi" (İngiltərə)
21:45. Pafos (Kipr) – "Vilyarreal" (İspaniya)
00:00. "Mançester Siti" (İngiltərə) – "Borussiya Dortmund” (Almaniya)
00:00. "İnter" (İtaliya) – "Kayrat" (Qazaxıstan)
00:00. "Brügge" (Belçika) – "Barselona" (İspaniya)
00:00. "Nyukasl" (İngiltərə) – "Atletik” (İspaniya)
00:00. "Benfika" (Portuqaliya) – "Bayer Leverkuzen” (Almaniya)
00:00. "Marsel" (Fransa) – "Atalanta" (İtaliya)
00:00. "Ayaks" (Niderland) - "Qalatasaray" (Türkiyə)
Qeyd edək ki, IV turun ilk 9 matçı noyabrın 4-də keçirilib.
