AFFA İcraiyyə Komitəsi Frank De Blekereni Hakimlər Komitəsinin sədri vəzifəsindən azad edərək, yerinə Rəhim Həsənovu təyin etdikdə bu sahədəki problemlərin həll olunacağına dair ümidlər yaranmışdı.
Lakin Azərbaycan Premyer Liqasının XIII turunda iki fərqli epizoda iki fərqli yanaşma problemlərin subyektiv amillərlə bağlı olduğu qənaətini yaratdı.
Noyabrın 29-da Quba Olimpiya İdman Kompleksinin stadionunda keçirilmiş oyunda "İmişli"nin "Sabah"ın qapısından keçirdiyi top qol kimi hesaba alınmadı. Özü də hakimlər VAR otağında epizoda xeyli baxıb-incələdikdən sonra belə qənaətə gəldilər. VAR hakimi isə illərin təcrübəsi Rauf Cabarov idi.
Ertəsi gün Qəbələ şəhər stadionunda yenə oxşar epizod yaşandı. Bu dəfə "Araz-Naxçıvan"ın futbolçusu Bəxtiyar Həsənalızadənin "Qəbələ"nin qapısından keçirdiyi top xeyli incələndi. Özü də yenə Rauf Cabarov tərəfindən.
Bu dəfə hansı qərarı versə, yaxşıdır? Qol qeydə alındı!
Hər iki epizod bir-birinin təkrarı, eyni VAR hakimi, amma fərqli qərarlar. Bir sözlə, ikili standartlar!
Özü də baş hakimi VAR-a çağırmadan, oyunu 5 dəqiqəyədək dayandırdıqdan sonra qərarlar verdi.
İndi "İmişli"ni bu paylaşıma görə necə haqlı saymayasan?
Paylaşımda deyilir:
"Hakim səhvlərinə görə xal itkiləri komandamız üçün ağır zərbədir. “İmişli - “Sabah” və “Qəbələ” - “Araz” oyunlarındakı epizodlar eynidir, biri qol sayılır digəri isə yox. Epizodları sizin ixtiyarınıza buraxırıq. Biz futbolda ədalətli qərarlar tələb edirik!"
"İmişli"ni qeyri-peşəkarlıqda, start heyətdə 10 legioner oynatmaqda, cənubdan gəlib şimalda ev oyunlarını keçirməkdə nə qədər desək, suçlaya bilərik. Amma klub bu məsələdə tam haqlıdır. Rauf Cabarov o xətkeşi hardan tapıb ki, xətti istənilən yerdən tutub çəkə bilir?
Bəlkə "Sabah"ın cəddindən qorxur?
P.S. AFFA Hakimlər Komitəsinin eyni referini iki oyuna VAR hakimi göndərməsi də bir ayrı komediyadır. Belə çıxır ki, Rauf Cabarovu da VAR hakimi yetişdirmək istəyirlər. Ya da ondan yaxşı VAR hakimi yoxdur. Amma necə birisi olduğunu iş başında hamı gördü...
