Bu gün futbol üzrə Azərbaycan Premyer Liqasında XIX tura yekun vurulub. Sportnet.az xəbər verir ki, turun son matçında paytaxtın iki klubu - "Zirə" və "İnter" üz-üzə gəlib.
Gərgin keçən qarşılaşmada gülən tərəf zirəlilər olub. Oyunda hesabı ev sahibləri açıb. Lakin qonaqlar sonradan oyunda tarazlıq yarada biliblər. Yalnız matçın son dəqiqələrində Nurlan Novruzov komandasının qələbə topunu vura bilib - 2:1.
"Qarabağ"ın AZAL-a məğlubiyyəti də gözlənilməz olub. Minimal hesabla məğlub olan Ağdam təmsilçisinə "Zirə" ən yaxın izləyici olub. Hazırda liderlə ikinci pillədəki komanda arasında xal fərqi 6-ya enib. Elə son iki pillədəki "Xəzər Lənkəran"la "Rəvan" arasında da eyni fərq davam edir. Buna iki komandanın görüşündə heç-heçənin qeydə alınması səbəb olub. -----------------------------------------------------------------------------------------------------------------------------------------------------------------
Bu gün futbol üzrə Azərbaycan Premyer Liqasında XIX turun son 3 oyunu keçirilir. Sportnet.az-ın məlumatına görə, günün qarşılaşmalarına Lənkəranda start verilir.
Son 2 pillədəki "Xəzər Lənkəran"la "Rəvan" üz-üzə gəlir. Bu komandalar mövsümün ilk yarısını 12 xalla başa vurmuşdular. Amma bir neçə gün öncə FİFA "Rəvan"ın hesabından 6 xal silib. Buna komandanın sabiq futbolçusu Artur Kotenkoya olan borcunu ödəməməsi səbəb olub. Ona görə də "sarı-qırmızılar"a səfər matçında mütləq 3 xal lazımdır.
Hər iki klub qış fasiləsində maddi problemlər üzündən bir sıra aparıcı futbolçusundan məhrum olub. Hazırlıq prosesinə də gec başlayan komandaların oyununun elə də yüksək səviyyədə keçməyəcəyi proqnozlaşdırılır.
"Xəzər Lənkəran"la "Rəvan" indiyədək 12 dəfə üz-üzə gəlib. Bunlardan 4-də "ağ-yaşıllar", 3-də "sarı-qırmızılar" qalib gəlibsə, 5 görüşdə qalib müəyyənləşməyib. Vurulan topların nisbəti də bugünkü meydan sahiblərinin xeyrinədir - 17:10. Digər tərəfdən, "Xəzər Lənkəran” 7 oyundur meydanı qolsuz tərk etmir. "Rəvan” son 3 matçda cəmi 1 xal qazanıb. Bakılılar səfərdəki bütün oyunlarda qol buraxıb.
Növbəti qarşılaşma AZAL-la lider "Qarabağ" arasında baş tutacaq. Bu mövsüm "AZAL Arena"dakı əvvəlki qarşılaşmalarda meydan sahibləri heç vaxt uduzmayıblar. Mövsümün ilk yarısının sonlarına doğru yaxşı forma yığan "təyyarəçilər" qış fasiləsində heyətinə 5 yeni oyunçu cəlb edib. Hazırda 22 xalla 7-ci pillədə olan baş məşqçi Tərlan Əhmədovun komandası özündən irəlidəki "Neftçi" ilə 5 xallıq fərqi yalnız qələbə sayəsində əvvəlki səviyyəyə endirə bilər.
"Qarabağ" isə əsas heyətə düşməkdə çətinlik çəkən bir çox futbolçusu ilə vidalaşıb və 3 oyunçu alıb. Onlardan Rahid Əmirquliyevlə Muarem Muaremin necə təsir bağışlayacaqları maraq doğurur.
Statistikaya nəzər yetirsək, iki komandanın əvvəlki 28 qarşılaşmasında AZAL cəmi 5 qələbə qazandığı halda, 17-də uduzub və 6 görüşdən "sülh"lə ayrılıb. Vurulann topların nisbəti 24:38-dir. "Qarabağ” son 8 qarşılaşmada qələbə qazanıb. Ağdam təmsilçisi 9 matçdır meydanı qolsuz tərk etmir. AZAL son 4 oyunda 1 qol vurub. "Qarabağ” son 4 səfərdə qol buraxmayıb.
Nəhayət, turun son oyununda "Zirə" və "İnter" komandaları üz-üzə gələcək. Bu oyunu turun mərkəzi görüşü də saymaq olar. "Kəpəz"in "Qəbələ"ni yenməsindən sonra məhz bu klublardan biri lider "Qarabağ"ın çempionluğuna mane ola bilərlər. Hər iki komanda qış toplanışını Antalyada keçib. "İnter" heyətini Kamran Ağayev və Vüqar Nadirov, "Zirə" isə Elvin Məmmədov kimi əsas yığmanın üzvləri ilə gücləndirib. Hazırda 29 xala malik "qartallar" qələbə qazansalar, "bankirlər"i 2 xal üstələyərək, 2-ci pilləyə yüksələcəklər. Heç-heçə isə baş məşqçi Adil Şükürovun komandasını 3-cü pilləyə qaytaracaq.
"Zirə" Premyer Liqanın debütantı olduğundan, "İnter"lə cəmi 2 oyun keçirib və bunların heç-birində hesab açılmayıb. Ona görə də bu komandalar arasındakı oyun ilk qolun vurulması ilə də əlamətdar olacaq.
13:30. "Xəzər Lənkəran" - "Rəvan" - 0:0
Hakimlər: Ömər Paşayev, Namiq Hüseynov, Kamran Bayramov, İnqilab Məmmədov
"Xəzər Lənkəran” mərkəzi stadionu
15:00. AZAL - "Qarabağ" - 1:0
Qol: Nuqzar Kvirtiya, 74
Hakimlər: Rəhim Həsənov, Yaşar Abbasov, İsgəndər Əliyev, Rəvan Həmzəzadə
AZAL Arena
17:30. "Zirə" - "İnter" - 2:1
Qol: Luis Alberto Diaz, 11. Nurlan Novruzov 85 - Abbas Hüseynov, 47
Hakimlər: Rauf Cabbarov, Mehman Mahmudov, Mübariz Haşımov, Elvin Əsgərov
Zirə İdman Kompleksinin stadionu
