"Oğlum Valehin bir futbolçu kimi perspektivi var. O, 3 il AFFA-nın bütün liqalarının bombardiri olub. Ancaq sözsüz ki, bugünkü gündə bu cür məşqlə heç nəyə nail olmaz olmaz. Hazırda təkcə "Bakı"da yox, digər klublarımızda da belə məşq prosesi ilə hər hansı uğurdan söhbət gedə bilməz". Bu fikirləri Sportnet.az-a açıqlamasında "Bakı"nın vitse-prezidenti Yaşar Seyidov deyib.
53 yaşlı futbol funksioneri yeniyetmə oğlu Valehin gələcək karyerası ilə bağlı planlarından söz açıb. Bildirib ki, kiçik Seyidov yaxın vaxtlarda İspaniyaya gedəcək: "Artıq müəyyən danışıqlar gedir. İspaniyadakı dostlarımız Valehi baxışa dəvət ediblər. Deyiblər ki, gəlsin, klubların birində təlim-məşq toplanışında iştirak etsin, ona baxaq. Valehin bir futbolçu kimi onların kriteriyalarına cavab verib-vermədiyini görmək istəyirlər. Hazırda fasilədir, oğlum ali məktəbdə imtahanlarını verəndən sonra İspaniyaya yollanacaq. Artıq hər şey özündən asılıdır. Baxışdan uğurla keçməyə nail olsa, İspaniyada qalacaq və karyerasını orada davam etdirəcək. Əks təqdirdə oğlumun karyerası ilə bağlı qəti nəsə deməkdə çətinlik çəkirəm".
Ata Seyidov oğlunun indiki hazırlıq səviyyəsinin İspaniyada oynamağı imkan vermədiyini gizlətmir: "İspanlar da futbolumuzda baş verən proseslərdən xəbərdardırlar. Bilirlər ki, bir-iki klubu çıxmaq şərtilə qalanlarında məşq prosesi aşağıdır. Buna görə də Valehə şans verilməlidir. O, İspaniyada heç olmasa 2 ayadək qalıb məşqlərdə iştirak etməlidir. İspanlar formasını bərpa etmək üçün oğluma şans verəcəkər. Valeh bundan istifadə edə bilməsə, geri qayıtmalı olacaq. Onun Avropa səviyyəsində hazırlığı olmayacaqsa, gələcəkdə futbolçu kimi çıxış etməklə bağlı qərarı özü verəcək".
Azərbaycan Dövlət İqtisad Universitetinin 2-ci kurs tələbəsi olan Valeh təhsilinə xüsusi diqqət yetirib. Üstəlik, 3 xarici dili bilər. Bunlar ingilis, ispan və fransızdır: "Hər üç dili özü öyrənib. Valeh Ankara liseyini qızıl medalla bitirib. Yəni savadlı olduğundan, ondan təhsili ilə bağlı böyük uğurlar gözləyirik. Sadəcə, Valeh futbolçu karyerasını davam etdirmək istəyir. Ancaq futbolçu olmaq da fitri istedadır, bir Allah vergisidir. Bu da var. Yəni tək özündən asılı deyil ki... Futbolda uğur qazana bilməsə, diqqətini təhsilə yönəltməli olacaq. Bu mənada İspaniya səfəri Valehin gələcək karyerası baxımından həlledici olacaq. Onun xaricdə oynamaqla yanaşı, təhsil almaq planı da var. Necə olacağını zaman göstərəcək”.
