"Kəpəz"in qış təlim-məşq toplanışı müddətində "Zirə" ilə keçirməyi nəzərdə tutduğu yoxlama matçı baş tutmayacaq.
Sportnet.az-ın məlumatına görə, paytaxt təmsilçisi görüş tarixinin açıqlandığı yanvarın 19-da Türkiyənin Antalya bölgəsində toplanışda olacaq. Gəncə komandası hazırlıq prosesini Bakıda keçəcəksə, "Zirə" yanvarın 16-da qardaş ölkəyə yollanacaq. Antalya toplanışı bir həftə davam edəcəyindən, "Kəpəz"lə qarşılaşma baş tutmayacaq.
"Zirə"nin mətbuat katibi Elman Himayətoğlu Sportnet.az-a bildirib ki, "Kəpəz"ə əvvəlcədən də yoxlama matçının keçirilməsinə dair razılıq verilməyib: "Gəncə klubundan bir neçə gün əvvəl, hətta dünən də baş məşqçimiz Ayxan Abbasovla əlaqə saxladılar və bizimlə oynamaq istədiklərini bildirdilər. Amma Ayxan müəllim onlara Türkiyəyə yollanmağı planlaşdırdıqlarını bildirdi. Onu da əlavə etdi ki, gedəsi olmasaq, bu haqda danışa bilərik. Amma "oynayacağıq" deyə söz vermədi".
Qeyd edək ki, "Kəpəz"in mətbuat xidməti hətta görüşün Zirə İdman Kompleksində keçiriləcəyini də açıqlayıb.
