"Qarabağ"ın futbolçusu Dino Ndlovu Azərbaycan Kubokunda finala yüksəlmə şanslarını dəyərləndirib.
Sportnet.az-ın məlumatına görə, öz ölkəsinin mətbuatına açıqlama verən cənubi afrikalı hücumçu ilk yarımfinal matçında "Neftçi" üzərində 2:0 hesablı səfər qələbəsini yaxşı nəticə adlandırıb. Lakin o, hələ heç nəyin yekunlaşmadığını bildirib: "Qarşıda cavab görüşü var. Ev oyunumuzda səylərimizi ikiqat artıracağımıza əmin olmalıyıq. Bunu etsək, əminəm ki, finala yüksələcəyik".
Qeyd edək ki, Dino Ndlovu bu mövsüm 11 dəfə fərqlənib. Qollardan 4-ü Azərbaycan Kubokuna təsadüf edib. Ndlovu bu göstəricidə keçmiş həmklubu, hazırda "Neftçi"də çıxış edən Namiq Ələsgərovla şərikli liderdir. O, "Neftçi" ilə ölkə kubokundakı ilk yarımfinal matçında ikinci qolun müəllifi olub. Cavab görüşü aprelin 5-də, final qarşılaşması isə mayın 5-də keçiriləcək.
