"Qara Qarayevi uşaqlıqdan tanıyıram, futboluna da çox yaxşı bələdəm. Biz U-17 yığmasında oynayanda Qara da U-15 yığmasında idi. Güclü oynayırdı deyə, bizimlə məşqlərə də cəlb edilirdi. Hər zaman çox çalışqan və əziyyəti sevən oyunçu olub”.
Bunu Sportnet.az-a açıqlamasında "Qarabağ” və U-21 yığma komandamızın keçmiş kapitanı Emin Mustafayev deyib. Qara Qarayevlə Ağdam klubunda və yığma komandalarda da birlikdə çıxış edən Mustafayev yarımmüdafiəçinin Moskva "Lokomotiv”inə mümkün keçidinə münasibət bildirib: "Qara çox əziyyət çəkib. Onun da qarşılığını indi görür. "Lokomotiv”ə keçidinə normal baxıram. Ancaq düzünü desəm, Qaranı daha iddialı ölkələrin klublarında görmək istəyərəm. Çünki o, buna layiq və güclü klublarda oynamağa qadir futbolçudur”.
