Futbol üzrə Çempionlar Liqasında son iki yarımfinalçı müəyyənləşib.
Sportnet.az-ın məlumatına görə, bunlar Fransanın "Monako" və İtaliyanın "Yuventus" klublarıdır. 1/4 final mərhələsinin cavab görüşləri çərçivəsində ikinci oyun günündə "Monako" Almaniyanın "Borussiya" (Dortmund), "Yuventus" isə İspaniyanın "Barselona" komandasını mübarizədən kənarlaşdırıb. Leonardo Jardimin baş məşqçi olduğu komanda Dortmundda olduğu kimi, Monakoda da 3 qol vurmağı bacarıb. Massimiliano Alleqrinin kollektivi isə Barselonada qapısının toxunulmazlığını qoruyub.
Qeyd edək ki, ilk oyun günündə İspaniyanın "Real Madrid" və "Atletiko" klubları da yarımfinala yüksəlib. Növbəti mərhələnin püşkü aprelin 21-də atılacaq.
--------------------------------------------
Bu gün futbol üzrə Çempionlar Liqasında daha iki yarımfinalçı müəyyənləşəcək.
Sportnet.az-ın məlumatına görə, bu, biri İspaniyada, digəri Fransada keçiriləcək 1/4 final mərhələsinin cavab oyunlarından sonra bəlli olacaq.
1/8 final mərhələsinin ilk matçı çərçivəsində Fransada PSJ klubuna 0:4 hesabı ilə uduzub, cavab görüşündə 6:1 hesabı ilə qalib gələn "Barselona”nı indi daha çətin tapşırıq gözləyir. Kataloniya təmsilçisi yarımfinala vəsiqə qazanmaq üçün "Yuvnetus”dan Turindəki 0:3 hesablı yenilginin əvəzini çıxmalıdır. "Barsa”ın heyətində Aleş Vidal ilə Rafinya, "Qoca Sinyora”dan isə Marko Pyatsa zədə üzündən meydana çıxa bilməyəcək.
Dortmund "Borussiya”sının işi isə daha çətindir. Almaniyada "Monako”ya 2:3 hesabı ilə uduzmaq öz yerində, Dortmund klubu cavab qarşılaşmasında Mark Bartra, Mario Götse və Andre Şürrle kimi zədəli futbolçularının xidmətindən yararlana bilməyəcək. Fransa təmsilçisinin heyətində isə Cibril Sidibe, Qabriel Boskilya və Quido Karrilyo zədəli, Fabinyo cəzalıdır.
Qeyd edək ki, bu gecə baş tutan 1/4 final mərhələsinin ilk cavab matçlarından sonra "Real Madrid” (İspaniya) və ”Atletiko” (İspaniya) yarımfinala yüksəlib.
Çempionlar Liqası
1/4 final mərhələsi, cavab oyunları
19 aprel
22:45. "Barselona” (İspaniya) - "Yuventus” (İtaliya) - 0:0
Baş hakim: Byorn Kuypers (Hollandiya)
İlk oyun – 0:3
22:50. Monako (Fransa) – Borussiya (Dortmund, Almaniya) - 3:1
Qol: Kilian Mbappe, 3. Radamel Falkao, 17. Valere Jermen, 81 - Marko Roys, 48
Baş hakim: Damir Skomina (Sloveniya)
İlk oyun – 3:2.
