"Çox vacib oyuna çıxırıq. Həddindən artıq ciddi hazırlaşmışıq. Vaxt az olsa da, əlimizdən gələni etməyə çalışırıq. Rəqibimiz xeyli oyunçu transfer edib, baş məşqçiləri italiyalıdır. Meydanda bir-birilərini tamamlayan futbolçulara sahibdirlər. Rəqibi oynamağa imkan verməyən komandadır. Əsas məsələ bizim meydanda düşündüklərimizi etməkdir. Pis hazırlaşmamışıq”.
Sportnet.az-ın məlumatına görə, bunu "Qarabağ”ın baş məşqçisi Qurban Qurbanov Çempionlar Liqasının III təsnifat mərhələsində Moldova "Şerif”i ilə keçirəcəkləri ilk oyundan əvvəl mətbuat konfransında deyib.
45 yaşlı mütəxəssis iyulun 25-də Tofiq Bəhramov adına Respublika stadionunda təşkil olunacaq qarşılaşma ərəfəsində jurnalistlərin digər suallarını da cavablandırıb...
- Dani Kintananı sabah meydana görə biləcəyik?
- Rəşad Sadıqovla Dani Kintana hazırda komanda ilə məşq etsələr də, meydana çıxmayacaqlar. Başqa problemimiz yoxdur. Elşən Abdullayevlə Abbas Hüseynov da komanda ilə çalışırlar.
- Əksəriyyət "Qarabağ”ın bu mərhələni asanlıqla keçəcəyini düşünür...
- Bir tərəfdən sağ olsunlar, bizə inanırlar. Hər il rəqiblərə qarşı belə fikirlər irəli sürülür. Biz isə həmişə ehtiyatlanmışıq. Rəqbi nə qədər analiz ediriksə, onlar da bizi incələyirlər. Hərə öz ölkəsinin çempionudur. Çempionlar Liqasının III təsnifat mərhələsi xüsusi önəm daşıyır. Çünki qalib gələn komanda Avropa Liqasının qrupuna vəsiqəni təmin edir. Rəqibin 7 yeni oyunçusu var, çox təcrübəlidirlər. "Şerif" asan rəqib deyil. Onlar da mərhələ keçməyi düşünürlər.
- Azarkeşlər "Qarabağ”dan Çempionlar Liqasının qrup mərhələsinə vəsiqə qazanmasını gözləyirlər. Bu, komandaya psixoloji təzyiq yaratmır?
- Bunun müsbət və mənfi tərəfləri var. Futbol elə oyundur ki, biz daim növbəti oyunumuzu düşünməliyik. İndidən qrupu düşünsək, futbolçuları sıxmış olarıq. Psixoloji təzyiq olar. Çempionlar Liqasında qrupa vəsiqə qazanmaqdan ötrü üç mərhələ keçməliyik. Bu, elə-belə turnir deyil.
- "Şerif” II təsnifat mərhələsində daha çox güc itirdi. Bu, "Qarabağ”ın lehinədir?
- Bu, futbolçunu yoran mərhələ deyil. Bunun müsbət və ya mənfi olduğunu bilmirəm. Hazırda Moldova çempionatı da keçirilir. Dünənki oyunda "9 nömrə”lərini oynatmamışdılar. Bir də orta xətt oyunçusu var, o, meydana sonradan daxil oldu. Görünür, kimdən narahatdırlarsa, onları oynatmayıblar.
- Əvvəlki illərdə III təsnifat mərhələsində məğlub olduğunuz komandalarla "Şerif”i müqayisə etsəniz, nə deyə bilərsiniz?
- Rəqibləri müqayisə etmək istəmirəm. "Zalsburq”la oyunumuz çətin olmuşdu. "Viktoriya” ilə görüşdə xeyli qol epziodumuz vardı. Üstün tərəf biz idik. Lakin rəqib mərhələ adladı. "Şerif”in baş məşqçisi çox taktiki dəyişikliklər edir. Sabah nə cür dəyişilik olsa, buna uyğun da tədbir görəcəyik.
- Heyəti müəyyənləşdirmisiniz?
- Baş məşqçilərin beynində hər zaman təxmini heyət olur. Lakin oyundan əvvəl açıqlamağı xoşlamıram.
- Sabahkı oyun Ağdamın işğal günündən sonraya təsadüf edir. Bu amil komandaya necə təsir edir?
- Bizim torpaqların işğalı ilə ilə bağlı hansısa günü fərqləndirmək istəmirəm. Düşüncəmiz bu komandanı saxlamaqdır. Oyunumuza baxıb, sevinən nə qədər məcburi köçkün var. İstər ağdamlı olsun, istərsə də digər rayonlardan.
- Tahir Gözəl hazırkı heyətin "Şerif”i kecəcək gücdə olduğunu söyləyib. Bəs növbəti raunda vəsiqə qazansanız, transferlər olacaq?
- Transferlərimiz mərhələ adlayıb-adlamamağımızla bağlı deyil. Bu gün də bəzi variantlar var, üzərində işləyirik. Danışıq apardıqlarımız var. Hər il komandaya 4-5 oyunçunun gəlib-getməsini xoşlamıram. Bizə uyğun oyunçular axtarırıq.
- Mahir Mədətovun çıxışından razı olmadığınız üçün hücumçuya ehtiyac duyursunuz?
- Bu, sizin şəxsi fikrinizdir. Mahir Mədətovun hazırkı durumu məndə müsbət fikir yaradır. Sadəcə, əlimizdə alternativ variantların olmasını istəyirik.
- Rəşad Sadıqov hazır olandan sonra Yakub Jezniçakla onun arasında seçim edən zaman kimə üstünlük verəcəksiniz?
- Rəşad tam sağlam olsun, bu, sonranın işidir.
- Riçard Almeydanın sabiq komanda yoldaşı onun "Qarabağ”da ilinə 500-550 min avro qazandığını söyləyib. Bu, doğrudur?
- Biz heç bir oyunçunun maaşını açıqlamırıq. Əsas odur ki, sonda oyunçu da razı qalır, biz də. Bu rəqəmi eşitməmişdim.
