“Çox pis oynadıq. Rəqibdən çəkindik, sanki dogma meydanda oynayan biz deyildik".
Sportnet.az-ın məlumatına görə, bunu Azərbaycanın 19 yaşadək futzalçılardan ibarət milli komandasının baş məşqçisi Ağatahir Əzimov Bakıda Türkiyə yığmasına 1:10 hesabı ilə uduzduqları növbəti yoldaşlıq görüşündən sonra affa.az-a açıqlamasında deyib. Gənc mütəxəssis məşqdə etdiklərini oyunda göstərə bilmədiklərini söyləyib: "Razıyam, fiziki cəhətdən rəqibdən geri qalırdıq. Ancaq verdiyim tapşırıqları da uşaqlar tətbiq edə bilmədilər. Seçim imkanımız məhduddur”.
Onun türkiyəli həmkarı Murat Kaya isə bildirib ki, 5:3 hesabı ilə qalib gəldikləri ilk oyunla müqayisədə müdafiədəki səhvləri düzəltməyə çalışıblar: "Bilirdik ki, rəqibimiz əsas standart vəziyyətlər zamanı təhlükəli olur. Bu dəfə səhvsiz oynadıq, sürəti artırmağa çalışdıq. Göstərdiyiniz qonaqpərvərliyə, diqqətə görə təşəkkürümüzü bildiririk. Bizim üçün faydalı oyunlar oldu”.
