UEFA Çempionlar Liqasının II təsnifat mərhələsinin “Neftçi” və Yunanıstan “Olimpiakos”u arasında keçiriləcək cavab oyunu öncəsi mətbuat konfransları və açıq məşqin vaxtı açıqlanıb.
Sportnet.az-ın məlumatına görə, "ağ-qaralar"ın baş məşqçisi Samir Abasov və futbolçu Sabir Buqrinin iştirakı ilə mətbuat konfransı 27 iyul saat 20:30-da “Bakcell Arena”da olacaq. Konfransdan sonra - saat 21:00-da isə komandamızın media nümayəndələri üçün açıq məşqi (ilk 15 dəqiqəsi) baş tutacaq. Hər iki tədbir “Neftçi TV” vasitəsilə canlı yayımlanacaq.
“Olimpiakos”un mətbuat konfransı və açıq məşqi isə iyulun 27-də Yunanıstanda keçiriləcək. Bakı vaxtı ilə saat 10:30-da klubun təlim-məşq bazasında rəqib komandanın açıq məşqi, 13:00-da isə “Georgios Karaiskakis” stadionunda “Zoom” proqramı vasitəsilə mətbuat konfransı təşkil olunacaq. Konfransda iştirak etmək istəyən KİV nümayəndələri üçün “Zoom” proqramının linki paylaşılacaq.
Qeyd edək ki, iyulun 27-də “Bakcell Arena”da keçiriləcək görüş saat 21:00-da başlanacaq.
