"Xəzər Lənkəran”ın yeni baş məşqçisi Yunis Hüseynovun müsahibəsi
- Sizin baş məşqçi postuna keçməyinizdən sonra komandada nə kimi dəyişikliklər olacaq? Planlarınız nədən ibarətdir?
- Planımız yaxşı, möhkəm komanda qurmaqdır. Gələn mövsüm yaxşı yerlər uğrunda mübarizə aparmaq istəyirik. Buna görə də, ilk növbədə, yaxşı komanda qurmalıyıq.
- "Xəzər Lənkəran” azarkeşləri öz komandalarından növbəti mövsümdə çempionluq gözləsinlərmi?
- İnşallah. Hər bir komanda çempionluğa oynayır, o cümlədən də biz.
- Bunun üçün ilk növbədə, heyət gücləndirilməlidir. Rəhbərliyə transfer siyahınızı təqdim etmisiniz?
- Rəhbərliklə görüşmüşəm. Onlar da öz tapşırıqlarını veriblər. Hazırda mən elə o işlərlə məşğulam. Fikrimdə olan, komandaya gətirmək istədiyim futbolçular var. Onları çağırıram, oturub, söhbətləşirik, fikirlərini bilirik.
- "İnter”dən ayrılan Səlahət Ağayevin "Xəzər Lənkəran”a keçidi gündəmdə idi. Bu məsələ nə yerdə qalıb?
- Onunla da maraqlanırıq. Görək də...
- Bu yaxınlarda Malidə oldunuz. Yəqin ki, ordan da futbolçular gətirmək fikriniz var...
- İnşallah. Ordan da transferlərimiz olmalıdır. Malidə bəyəndiyimiz futbolçular oldu. İndi onlarla danışıqlar gedir. Desəm ki, onları yüz faiz transfer edəcəyik, yalan olar. Bəyəndiyimiz 3 futbolçu olub. İndi onların menecerləri ilə danışıqlar olacaq.
- Başa çatan mövsümdə əsas komandada oynamış gənc futbolçulardan kimləri götürəcəksiniz?
- Hələ ki, onlar komandada qalıblar. Bu, gələcəyin işidir. Qarşıda görəcəyimiz işlərdən sonra onların taleyi bilinəcək.
- Bəs komandadan ayrılacaq futbolçuları, yəni "qara siyahı”nı müəyyənləşdirmisizmi?
- Artıq "qara siyahı” hazırdır. Onu Türkiyəyə təlim-məşq toplanışına getməmişdən əvvəl açıqlayacağam.
- İkinci dəfədir "Xəzər Lənkəran”ın baş məşqçisi təyin olunursunuz. İlk fəaliyyətiniz qısa çəkmişdi. Sizcə, bu dəfə necə olacaq?
- İnşallah, bu dəfə uzun çəkəcək (gülür). Mən buna inanıram (apasport.az).
