Ağdamın "Qarabağ” klubunun baş məşqçisi Qurban Qurbanov Avstriya toplanışını dəyərləndirib. Sportnet.az-ın məlumatına görə, 42 yaşlı mütəxəssis klubun rəsmi saytına açıqlamasında hazırlıq prosesindən razı qaldığını bildirib.
O deyib: "Burada 5 oyun keçirməyi planlaşdırırdıq. İlk 2 oyunda məğlub olsaq da, sonradan qələbələr qazandıq. İlk oyunlarda hazırlığa yeni başlamışdıq. Sonradan tədricən proqramımıza uyğun çalışmalaramızı yerinə yetirdik. Ümumi götürdükdə oyunlardan razı qaldım. Düzdür, belə tipli oyunlarda hesab bir o qədər əhəmiyyət kəsb etmir. Amma futbolçuların əzmindən razı qaldım. 1-2 xırda problemi nəzərə almasaq, hazırlıqdan narazılığım yoxdur”.
Qurbanov indi bütün diqqətlərini Malta "Valletta”sı ilə Çempionlar Liqasının II təsnifat mərhələsi qarşılaşmalarına yönəltdiklərini bildirib: "Qarşıdan "Valletta” ilə oyun gəlir. Matça qədər hardasa 1 həftə vaxtımız var. İndi diqqətimizi bu qarşılaşamanın hazırlığına yönəldəcəyik”.
Qeyd edək ki, "Qarabağ"la "Valletta" arasındakı ilk oyun iyulun 15-də səfərdə, cavab oyunu isə iyulun 22-də ölkəmizdə baş tutacaq.
