"Qarabağ" klubu Azərbaycan Premyer Liqasında mövsümün ilk turunda "Neftçi" ilə oyunu azlıqda başa vurub. Sportnet.az-ın məlumatına görə, buna uzun müddət sonra yaşıl meydanlara qayıdan Dani Kintananın zədələnməsi səbəb olub.
İspaniyalı yarımmüdafiəçi oyunun sonlarında ikili mübarizə nəticəsində ayağından xəsarət alıb. Həkimlər onun oyunu davam etdirməsinə icazə verməyiblər. Bu vaxt baş məşqçi Qurban Qurbanov hər 3 əvəzləmədən yararlandığı üçün komandası meydanda 10 oyunçu ilə qalıb. Bundan yararlanan "Neftçi" uzatma dəqiqələrində təsəlli qolunu vurub - 1:3.
