Şose velosipedi üzrə Azərbaycanın Elit/U23 yığma komandası Beynəlxalq Velosipedçilər İttifaqının (UCI) 2.2 kateqoriyalı “Tour of Albania” yarışında uğurla mübarizə aparır.
Sportnet.az xəbər verir ki, yığmanın liderlərindən olan Elçin Əsədov yarışın birinci mərhələsini ən yaxşı sprinterlərin sırasında - 7-ci pillədə başa vurub.
O, aralıq finişlərində 17 xal toplayıb. Əsədov hazırda ümumi təsnifatda 6-cı yerdə qərarlaşıb. Millinin digər üzvü Musa Mikayılzadə isə birinci mərhələdə 12-ci olub.
İlk mərhələdə velosipedçilər 161 km məsafə qət ediblər.
Yarışın ikinci mərhələsi isə iyunun 1-də keçiriləcək. Bu mərhələdə velosipedçilər 153 km məsafədə mübarizə aparacaqlar.
Xatırladaq ki, mötəbər yarışda Azərbaycanı Elit/U23 yığma komandanın üzvləri Elçin Əsədov, Elgün Əlizadə, Musa Mikayılzadə, Əli Qurbanov, Şahin Eyvazov və Yusif İsmayılov təmsil edir. Milliyə baş məşqçi Asif Həsənov rəhbərlik edir.
