"Bakı şəhər Təcili və Təxirəsalınmaz Tibbi Yardım Stansiyası ölkədə keçirilməsi nəzərdə tutulan beynəlxalq səviyyəli tədbirlərdə təcili və təxirəsalınmaz tibbi yardım xidmətinin yüksək səviyyədə təşkili məqsədi ilə zəruri işlər görür". Sportnet.az-ın "Report"a istinadən məlumatına görə, bunu Stansiyanın baş həkimi Rauf Nağıyev mətbuat konfransında deyib.
Onun sözlərinə görə, 17 yaşadək futbolçular arasında Bakıda keçiriləcək Avropa çempionatın və Formula 1 yarışlarında idmançılara, xarici ölkələrdən gələn azarkeşlərə və tamaşaçılara ilkin tibbi yardım etmək üçün stansiyanın tibbi heyətinin hazırlıq məşğələlərinin keçirilməsi nəzərdə tutulub. Bundan əlavə, Bakıya tədbirlər üçün 100 yeni müasir avadanlıqlarla təchiz olunan təcili yardım avtomobilləri gətirilib. Yarışlarda hər kəsə təcili yardım göstərmək üçün kifayət qədər həkim briqadası var. Eytiyac olarsa, əlavə həkim briqadaları da bu işə cəlb edilə bilər".
Baş həkim onu da qeyd edib ki, "Bakı-2015"də stansiya bölmələrinin 200-ə yaxın seçilmiş həkimləri təlim kurslarına cəlb olunub: "Bu il keçiriləcək beynəlxalq yarışlara da həmin heyət yenidən təlimlərə cəlb olunaraq, onların xidmətlərindən istifadə olunacaq".
