Azərbaycan sərbəst güləşçisi Hacımurad Hacıyev Slovakiyanın Trnava şəhərində gənclər arasında keçirilən dünya çempionatında qızıl medal qazanıb.
Sportnet.az xəbər verir ki, 70 kq çəki dərəcəsində yer alan Hacıyev finalda rusiyalı Razambek Camalova qalib gəlib - 4:3. İlk hissədən sonra 0:3 hesabı ilə geridə olan azərbaycanlı pəhləvan görüşün sonlarında geridönüş edərək dünya çempionu olub. Bu, ölkənin cari mundialda ilk qızıl medalıdır.
Orxan Abbasov isə bürünc medala sahib olub. O, 3-cü yer uğrunda görüşdə moldovalı Andrian Qrosulu sonuncu xalı qazandığı üçün üstələyib - 3:3.
Əvəzində 57 kq çəkidəki Əliabbas Rzazadə 1/8 finalda ermənistanlı Arsen Harutyunyana uduzub - 1:6. 65 kq-da yer alan Röyal Ağamalıyevin qarşısını eyni mərhələdə moldovalı Nikolay Qrahmez kəsib - 3:7. 97 kq-da Orxan Həsənov isə elə ilk görüşdəcə qazaxıstanlı Serik Bakitxanova uduzub - 0:7.
