Rusiyanın paytaxtı Moskvada sərbəst və yunan-Roma güləşi üzrə ikiqat olimpiya çempionu İvan Yarıginin xatirəsinə "Alrosa" Kuboku keçirilib.
Sportnet.az xəbər verir ki, "Dinamo" İdman Sarayında təşkil olunan turnirdə olimpiya çəkilərində çıxış edən güləşçilərdən ibarət komandalar yarışıb.
Sərbəst güləşçilərin turnirində Azərbaycanı məşqçi Nazim Əlicanovun rəhbərliyi altında İslam Bazarqanov (57 kq), Ənvərbəy Dalqatov (65 kq), Hacımurad Ömərov (74 kq), Kənan Əliyev (86 kq), Roman Bəkirov (97 kq) və Rahid Həmidlidən (125 kq) ibarət komanda Gürcüstana qalib gəlib, Rusiya, İran və Özbəkistana uduzub. Bu nəticə ilə yığma 4-cü yeri tutub.
Yunan-Roma güləşi üzrə millinin heyətində Ramiz Məmmədov (60 kq), Kərim Cəfərov (67 kq), İslambek Dadov (77 kq), Rafiq Hüseynov (87 kq), Zamir Məhəmmədov (97 kq) və Türmən Eyyubov (130 kq) yer alıb. Məşqçilər Turac Hüseynli və Zöhrab Abbasovun tapşırıqlarını icra edən komanda Rusiya və Özbəkistana məğlub olub, Gürcüstana isə qalib gəlib. Bu nəticə ilə milli "Alrosa" Kubokunu bürünc medalla başa vurub.
Qeyd edək ki, görüşlərin idarə edilməsində Azərbaycanı I dərəcəli beynəlxalq hakim Natiq Hacıyev təmsil edib.
