Bakıda keçiriləcək 2016-cı il Rio-de-Janeyro Yay Olimpiya Oyunlarına lisenziya xarakterli Dünya Təsnifat Turnirində əfsanəvi boksçu Məhəmməd Əlinin anım tədbiri nəzərdə tutulmayıb. Bu barədə Sportnet.az-a Azərbaycan Boks Federasiyasının icraçı direktoru və yarışın Təşkilat Komitəsinin üzvü Nağı Səfərov məlumat verib.
Onun sözlərinə görə, Beynəlxalq Həvəskar Boks Assosiasiyasından göndərilmiş proqramda belə bir qeyd yoxdur. N.Səfərov 105 ölkədən 469 boksçunun qatılacağı yarış zamanı məhz bu proqram üzrə hərəkət edəcəklərini vurğulayıb.
Qeyd edək ki, Məhəmməd Əli həvəskar boksda 81 kq çəki dərəcəsində 1960-cı il Roma Yay Olimpiya Oyunlarının qızıl medalçısı olub. Sonrada o, peşəkar boksa keçib. ABŞ idmançısı ağır çəki dərəcəsində 61 döyüşündən 56-nı qələbə ilə başa vurub. Döyüşlərin 37-si nokautla nəticələnib. Məhəmməd Əli iyunun 3-də 75 yaşında dünyasını dəyişib.
