"Sentyabrda Minskdə keçirilən beynəlxalq turnirdə komandamızın gücünü gördük”.
Sportnet.az xəbər verir ki, bunu Azərbaycan Güləş Federasiyasının mətbuat xidmətinə yunan-Roma güləşi üzrə yığmanın baş məşqçisi Şaban Donat deyib.
Türkiyəli mütəxəssis hazırda təlim-məşq toplanışında olan yığma dünya çempionatına optimal formada yollanacaq: "Murad Məmmədov (60 kq) və Taleh Məmmədov (63 kq) yaxşı güləşdi. Müəyyən çatışmazlıqları da müşahidə etdik. Bizim üçün bu yarış səmərəli oldu. Bu toplanışı da uğurla başa vurub, dünya çempionatına tam hazır vəziyyətdə yollanacağıq. Fiziki yükləmələr olmayacaq. Çünki iki dəfə Göygöldə baş tutan toplanışda daha çox fiziki hazırlığa üstünlük vermişdik. Bu səbəbdən son toplanışda əsasən taktiki-texniki hazırlıq üzərində işləyəcəyik. Bildiyiniz kimi, mən daha öncə gənclərdən ibarət yığmanı çalışdırırdım. Millidəki güləşçilərin bir neçəsi həmin komandada rəhbərliyim altında çıxış etdiyindən onların potensialına yaxşı bələdəm. Gənclərlə işləməyə davam edirik. Əsas yığmaya vaxtaşırı perspektiv vəd edən gənc güləşçiləri cəlb edirik”.
Baş məşqçisi zədəsini sağaldan Rəsul Çunayevin də məşqlərdə iştirak etdiyini söyləyib: "Dünya çempionatına kimi onu hazır vəziyyətə gətirəcəyik. Zədəli güləşçimizin olmaması sevindirici haldır. Azərbaycanın güləşdə böyük hədəfləri var. Əsas məqsədimiz Tokio Olimpiadasında qızıl medal qazanmağa namizəd güləşçiləri yetişdirməkdir. Bu istiqamətdə bizim üçün hər bir şəraiti yaradan federasiya rəhbərliyinə minnətdarlığımı bildirirəm”.
Xatırladaq ki, dünya çempionatı oktyabrın 20-dən 28-dək Macarıstanın paytaxtı Budapeştdə keçiriləcək. Yunan-Roma güləşi üzrə millimiz oktyabrın 2-dən Olimpiya Güləş Mərkəzində təlim-məşq toplanışına başlayıb. Baş məşqçi Şaban Donat, böyük məşqçi Rövşən Bayramov və məşqçilər Emin Əhmədovla Turac Hüseynlinin rəhbərliyi altında start götürən hazırlıq prosesində gənclərdən ibarət yığmamızın aparıcı üzvləri də iştirak edir.
