"Bu komandaya keçid karyeramda yeni səhifə, yeni hədəflər deməkdir. Yeni komandam Avropa Liqasında çıxış edəcək və Azərbaycan Premyer Liqasında çempionluq uğrunda mübarizə aparacaq. Hədəfləri olan komandada çıxış etmək hər futbolçunun arzusudur. Mən də "Qəbələ"yə keçdiyimə görə məmnunam". Sportnet.az-ın məlumatına görə, bunu "Qəbələ"nin yeni transferi Sergey Zenyov klubun rəsmi saytına açıqlamasında deyib.
26 yaşlı hücumçu yeni komandasına Avroliqa və Premyer Liqada yardımçı olmağı hədəflədiyini bildirib: "Qəbələ" haqda qiyabi məlumatlara malikəm. İnternet vasitəsilə komandanı, klubun yerləşdiyi şəhəri, şəraiti və bazanı araşdırmışam. Heyətdə daha öncə rəqib kimi qarşılaşdığımız futbolçular var. Bu mənada Qayı, Vernidubu, Bezotosnını tanıyıram. Onların oyununa yaxşı bələdəm. Daha öncə "Karpatı"nın heyətində Avropa Liqasında çıxış etmişəm. Məqsədim təcrübəmdən istifadə edərək komandama həm Avropa Liqasında, həm də ölkə çempionatında kömək olmaqdır".
Qeyd edək ki, Sergey Zenyov "Qəbələ" ilə 2 illik müqavilə bağlayıb.
