Rusiya milli komandasının dünya futbol landşaftına qayıdışı Ukraynadakı situasiyanın həlli anlamına gələcək.
Sportnet.az-ın məlumatına görə, bu barədə Serbiyanın paytaxtı Belqradda keçirilən UEFA-nın 49-cu Konqresində FIFA prezidenti Canni İnfantino açıqlama verib.
O, hazırda Ukraynada sülhün bərpası istiqamətində danışıqların davam etdiyini xatırladaraq, "Ümidvaram ki, tezliklə səhifəni çevirə və Rusiyanı futbol landşaftına qaytara biləcəyik" deyib.
İnfantino bundan ötrü dua etməli olduqlarını vurğulayıb. FIFA prezidentinin fikrincə, futbol ayırıcı yox, birləşdirici rola xidmət edir.
Qeyd edək ki, Rusiya yığması və klubları FIFA və UEFA bayrağı altında keçirilən turnirlərdən 2022-ci ildə uzaqlaşdırılıblar. Buna görə də qonşu ölkə millisi 2022-ci il dünya çempionatını və 2024-cü il Avropa çempionatını buraxıb, DÇ-2026-nın seçmə mərhələsinin püşkatma mərasimində iştirak etməyib.
