İngiltərə "Mançester Siti"sinin baş məşqçisi Xosep Qvardiola komandasının oyun tərzi ilə bağlı danışıb.
Sportnet.az xəbər verir ki, 54 yaşlı ispaniyalı mütəxəssis klubun rəsmi saytına açıqlamasında oyun fəlsəfəsini dəyişməyəcəyini qeyd edib.
"Mən heç vaxt, heç vaxt oyun üslubumla bağlı inancıma xəyanət etməyəcəyəm. Top meydançaya qayıdırsa, sürətli hücum istəyirəm. Rəqib pressinq edəndə, fərdi oynayanda və biz ilk pressinqi qıranda, mən sürətli hücum istəyirəm. Amma bundan sonra milyonlarla darıxdırıcı, bezdirici ötürmələri çox sevirəm. Xoşuma gəlir ki, komandam topa nəzarət etsin və oynasın, oynasın, oynasın” - deyə, Qvardiola vurğulayıb.
Qeyd edək ki, “Mançester Siti” Premyer Liqanın III turunda səfərdə "Brayton"la qarşılaşacaq. Bu gün keçiriləcək oyun saat 17:00-da başlanacaq.
