"Rəqibi qələbə münasibətilə təbrik edirəm".
Sportnet.az-ın məlumatına görə, bunu "Sabah" komandasının baş məşqçisi Valdas Dambrauskas evdə "İmişli"yə 0:1 hesabı ilə uduzduqları Azərbaycan Premyer Liqasının III tur matçından sonra mətbuat konfransında deyib.
Litvalı mütəxəssis bildirib ki, bu, Jorj Kaşkilyanın baş məşqçi olduğu kollektiv üçün böyük qalibiyyətdir: "Onlar qələbəni təntənəli şəkildə qeyd edirdilər".
48 yaşlı baş məşqçinin fikrincə, oyun belə alınmamalı idi: "Futbolda bəzən belə hallar baş verir. Hər iki hissədə dominantlıq edən, topa daha çox sahib olan, rəqibin cərimə meydançasına girən tərəf biz idik. Amma qapının önündə kəskinlik, hücumlarda itilik çatışmırdı. Rəqibin hər iki hissədə bir təhlükəli vəziyyəti oldu və bunların birindən fərqləndi".
Dambrauskas səhvlərdən nəticə çıxarmalı olduqlarını söyləyib: "Əlbəttə, belə yanlışlıqlara yol verməməliyik. Milli fasilədə çalışacağıq ki, çatışmayan cəhətləri, xüsusən, üçüncü bölgədə rəqib qapısına yaxın oyunlardakı qüsurları aradan qaldıraq, düzəldək və inkişaf etdirək".
