"Oyun bizim üçün kifayət qədər gərgin keçdi. Uduzduğumuz üçün müəyyən qədər məyusluq yaşadıq. Bununla belə, “Sabah” kimi güclü bir komandaya qarşı belə səviyyəli oyun sərgiləməyimiz bizim üçün də müsbət haldır. Oyunçularımız yüksək rəqabət göstərdilər.
Birinci hissəyə “Sabah” daha yaxşı başladı, lakin sonradan biz oyunu bərabərləşdirməyi bacardıq və hətta bir qol da vurduq. Hesab etdiyimizə görə həmin qol ofsayd deyildi, amma VAR fərqli qərar verdi. Təəssüf ki, bu ilk dəfə deyil ki, çətin məqamlarda VAR qərarları bizim əleyhimizə olur. Bu da məsələnin digər tərəfidir.
Sportnet.az-ın məlumatına görə, bunu "İmişli"nin baş məşqçisi Jorj Kaşkilya Quba Olimpiya İdman Kompleksinin stadionunda "Sabah"a 0:3 hesabı ilə məğlub olduqları Azərbaycan Premyer Liqasının XIII tur matçından sonra mətbuat konfransında deyib.
Daha sora portuqaliyalı mütəxəssis jurnalistlərin suallarını cavablandırıb:
- Növbəti matçınız da Azərbaycan Kubokunun 1/8 finalında "Sabah"a qarşıdır. Qışa müddətdə nəyi dəyişməyi düşünürsünüz?
- Eyni qaydada məşqlərimizə davam edəcəyik. Bu gün komandam yaxşı oyun nümayiş etdirdi. Qışa müddətdə iki matç olduğu üçün heyətdə bir neçə dəyişiklik olacaq. Çünki bərpa prosesi vacibdir. "Sumqayıt"la çempionat oyununu da düşünməliyik.
- "Sabah"ın baş məşqçisi bildirdi ki, bu stadion Premyer Liqa səviyyəsində deyil. Siz necə düşünürsünüz?
- Həmkarının sözlərinə hörmətlə yanaşıram. Bura bizim ev oyunlarını keçirdiyimiz stadiondur. Baxın görün, biz evdə və səfərdə necə oynayırıq.
- "Neftçi" üzərindəki qələbədən sonra bu gün "Sabah"a böyük hesabla uduzdunuz. Meydança amilinin oyununuza təsiri oldu?
- Meydançadan çox rəqibimizi daha çox düşünürük. "Sabah"ın Premyer Liqada bir məğlubiyyəti var, o da bizimlə oyunda. Bu matça da qələbə üçün çıxmışdıq. Meydan barədə heç nə deməyəcəyəm. Çünki futbolda əsas olan taktiki yanaşmadır.
- Bu gün 10 legionerlə meydana çıxmışdınız. Əlinizdə imkan olsaydı, Azər Salahlının yerinə də əcnəbi futbolçu oynadırdınız?
- Azər bizim kapitanımızdır, komanda üçün çox vacib oyunçudur. Bu gün səhv etməsi heç nəyi dəyişmir. Bu, futboldur, səhvlər olur. Əcnəbi futbolçular da səhv edir.
