Bu gün Azərbaycan Premyer Liqasının XIX turunun iki oyunu keçirilib. Sportnet.az-ın məlumatına görə, görüşlər Gəncə və Bakıda baş tutub.
"Kəpəz" doğma azarkeşlər önündə "Qəbələ" ilə qarşılaşıb. Qarşılaşmaya meydan sahibləri daha aktiv başlayıb. Nəticədə matçın 26-ıc dəqiqəsində Julien Ebah komandasını hesabda önə çıxarıb. İlk hissə "sarı-göylər"in 1:0 hesablı qələbəsi ilə yekunlaşıb. İkinci hissədə də Şahin Diniyevin rəhbərlik etdiyi komandanın üstünlüyü ilə keçib. Əvvəlcə oyunun 57-ci dəqiqəsində Namiq Ələsgərov fərqlənib. 75-ci dəqiqədə isə Ebah dubl edib. Qarşılaşma "Kəpəz"in 3:0 hesablı qələbəsi ilə başa çatıb.
"Kəpəz" bu qələbədən sonra xal hesabını 29-a çatdırıb və turnir cədvəlində 3-cü pilləyə yüksəlib. Aktivində 28 xal olan "Qəbələ" isə turnir cədvəlində 5-cidir.
Günün son oyunu isə paytaxtda keçirilib. "Bakcell Arena"da "Neftçi" və "Sumqayıt" komandaları üz-üzə gəlib. İlk hissədə qapılara qol vurulmayıb. İkinci hissədə "ağ-qaralar"ın futbolçusu Ruslan Qurbanov adını tabloya yazdırıb - 1:0. Qarşılaşma bu hesabla da yekunlaşıb.
"Neftçi" XIX turdan sonra 27 xalla turnir cədvəlində 6-cı, "Sumqayıt" isə 18 xalla 8-ci pillədədir.
Qeyd edək ki, turun digər oyunları yanvarın 31-də keçiriləcək.
-----------
Bu gün futbol üzrə Azərbaycan Premyer Liqasının 2015/2016 mövsümünün ikinci yarısına start veriləcək. Sportnet.az-ın məlumatına görə, 40 günlük fasilədən sonra ilk olaraq meydana "Kəpəz" və "Qəbələ" komandaları çıxacaq.
Qış təlim-məşq toplanışı Türkiyədə keçən "qırmızı-qaralar" XIX turun açılış oyununu Gəncə şəhər stadionunda keçirəcək. Roman Qriqorçukun rəhbərlik etdiyi komanda səfərdən 3 xalla dönəcəyi təqdirdə, xal ehtiyatını 31-ə çatdıracaq və ilk üçlüyə yüksələcək. Şahin Diniyevin başçılıq etdiyi "Kəpəz" isə doğma meydanda qələbə qazanarsa, xallarını 29-a çatdıraraq, "Qəbələ"ni geridə qoyacaq.
Bugünədək komandalar ölkə çempionatında 10 dəfə üz-üzə gəlib. Bu grüşlərin 4-ü sülhlə bitib. Qalan 6 qarşılaşmada əyalət təmsilçiləri eyni sayda qələbə əldə ediblər. "Qəbələ" hazırda 28 xalla turnir cədvəlində 4-cü, "Kəpəz" isə 26 xalla 5-ci pillədədir.
Günün son qarşılaşmasında isə "Neftçi" və "Sumqayıt" komandaları münasibətlərinə aydınlıq gətirəcəklər. Heyətini Səlahət Ağayev, Rasim Ramaldanov və Vaqif Cavadov kimi futbolçularla gücləndirən "Gənclik şəhəri" təmsilçisi qələbə sayəsində ən yaxın qonşusu olan AZAL-la xal fərqini minimuma endirəcək. "Ağ-qaralar" isə evdə əldə olunan 3 xalla 5-ci pilləyə qalxacaqlar.
Qış fasiləsində heç bir futbolçu transfer etməyən flaqmandan fərqli olaraq, "gənclik şəhəri" təmsilçisi heyətini 6 oyunçu ilə gücləndirib. Onların arasında Səlahət Ağayev, Rasim Ramaldanov və Vaqif Cavadov kimi milli üzvləri də var.
Komandalar bugünədək 14 dəfə üz-üzə gəlib. Bunların 9-da "Neftçi", 3-də isə "Sumqayıt" qələbəyə sevinib. Digər 2 oyunda isə bərabərlik qeydə alınıb. "Neftçi" hazırda 24 xalla 6-cı, "Sumqayıt" isə 18 xalla 8-ci pillədədir.
Hər iki oyun "CBC Sport" telekanalı vasitəsilə canlı yayımlanacaq.
Azərbaycan Premyer Liqası, XIX tur
30 yanvar
14:00. "Kəpəz" – "Qəbələ" - 3:0
Qol: Jülyen Ebah, 26; 75. Namik Ələsgərov, 57
Hakimlər: Fariz Yusifov, Vaqif Musayev, Nahid Əliyev, Ziya Nəsirov
AFFA nümayəndəsi: Namiq Məstanov
Hakim-inspektor: Rövşən Əhmədov
Gəncə şəhər stadionu
16:30. "Neftçi" – "Sumqayıt" - 1:0
Qol: Ruslan Qurbanov, 55
Hakimlər: Əliyar Ağayev, Zeynal Zeynalov, Rza Məmmədov, Ramil Diniyev
AFFA nümayəndəsi: Elbrus Abbasov
Hakim-inspektor: Şahin Cəfərov
"Bakcell Arena"
