"Neftçi”nin çilili hücumçusu Nikolas Kanalesin Sportnet.az-a müsahibəsi
- AZAL-la oyun və vurduğun qolla bağlı fikirlərin necədir?
- Qol vura bildiyim üçün çox xoşbəxtəm. Çünki 7-8 ay idi ki, qol vura bilmirdim və bu durum mənim üçün sıxıcı idi. Məncə, bugünkü oyunda nəticə gözlənilməz oldu. Matçda qol imkanlarınız çox idi. Ancaq yararlana bilmədik. Fikrimcə, nəticə xeyrimizə deyil.
- AZAL-ın ev oyunlarında meydançanın süni örtüyü hər zaman rəqiblər üçün mənfi amil olur. Səncə, qazon rəqib üçün üstünlük oldumu?
- Meydançanın sintetik olması şəxsən mənim üçün problem deyildi. Komandamız belə qazonda çox qol imkanı əldə etdi. Bəlkə rəqib üçün 1-2 faiz üstünlük oldu.
- Bu qolla Kanalesin qayıtdığını, yenidən öz sözünü dediyini söyləmək olar?
- Niyə də yox? Bu, oyun ərzində qol vurmaq üçün yeganə şansım idi.
- "Neftçi" əvvəlki dövrlərdə çempionluğa oynayırdısa, indi 7-ci yerdədir. Komandanın bu mövqeyi sənə maraqsız gəlmir?
- Əlbəttə, keçmiş illərlə müqayisədə fərq böyükdür. Amma futbolçular, komanda bu vəziyyətə adaptasiya olmalıdır. Maliyyə problemi təkcə "Neftçi”də deyil, bütün ölkədə var.
- Meydanda olarkən gözlərin Flavinyonu, Culius Vobayı axtarırmı?
- Əlbəttə. Flavinyo ilə Vobay üçün darıxırıam. Ardıcıl 2 il onlarla bir yerdə oynamışam.
- AZAL-a vurduğun qol "Neftçi”nin milli çempionatlarda 1200-cü qolu kimi tarixə düşdü. Bu şəxsi göstərici sənin üçün nə deməkdir?
- Bu statistik fakt barədə sizdən xəbər tutdum. Mənin üçün sevindirici xəbər oldu. Şadam ki, "Neftçi”nin tarixinə düşdüm. Növbəti əlamətdar qolların müəllifi olmağa çalışacağam. Ümid edirəm ki, bu, mənə, komandama nəsib olacaq.
- Çempionatdan Avropa Liqasına vəsiqə qazanmağınız çətindir. Ancaq ora ən qısa yol, ən real şans ölkə kubokundandır. Şansları necə dəyərləndirirsən?
- Bütün şanslarımızı dəyərləndirməliyk. Bilirik ki, Premyer Liqada çempionluq üçün oynamaq çətin olacaq. İki yarımfinal oyunumuz var. "Qəbələ”ni keçsək, finalda oynamalıyıq. Kubokda qələbə qazanmalıyıq. Premyer Liqada isə durumumuz çətindir.
